Kaviarni Minska: «Fierź»

pn-pt: 10:00 — 23:00

sb-ndz: 11:00 — 23:00

Dzie: zav. Muzyčny, ½

Teł.: (017) 226-50-45, (017) 226-50-46.

Kožny sučasny horad — heta žyvy arhanizm. Jaho vialikaja historyja — heta doŭhaje žyćcio. Žyćcio niepaŭtornaje, svojeasablivaje. Tady Stary horad — heta serca, jakoje kaliści daŭno pavolna i aściarožna dało žyćcio ŭsiamu astatniamu.

Na sercy Minska šmat hłybokich ranaŭ: heta i siaredniaviečnyja pažary, i balučyja ŭkoły ad nacystaŭ i ad balšavikoŭ. Na žal, i siońniašnija apieracyi na im, jakija zavucca rekanstrukcyjaj i restaŭracyjaj, robiacca nie pa jeŭrapiejskich miedycynskich technałohijach. Mienavita tamu bol na sercy tysiačahadovaha Minska časam tolki ŭzmacniajecca. Praz amal poŭnuju adsutnaść atmaśfiernych, aŭtentyčnych miescaŭ naš Vierchni horad nie vabić šmattysiačnyja natoŭpy turystaŭ. Niama dzie pačastavacca starym mienskim źbitniem albo asablivymi hatunkami tutejšaha piva. Usio heta źnikła… Mienavita tamu raźvivać abjekty hramadskaha charčavańnia mahčyma i navat treba. Tym bolš što dobryja prykłady jość.

Kaviarnia «Fierź» — adzin ź ich. Tut, u maleńkim pryhožym budynku na rahu starych Manastyrskaha i Małamanastyrskaha zavułkaŭ (jakija siońnia majuć hučnyja nazvy Muzyčnaha zavułka dy vulicy Hiercena) kožny moža apynucca ŭ minskaj kaviarni, zroblenaj na jeŭrapiejski ład.

Što ŭnutry?

«Fierź» — heta, pa-pieršaje, vielmi dobraja kava, vodar jakoj sapraŭdy łunaje ŭ pavietry. Pa-druhoje, heta pryjemnaja atmaśfiera, u jakoj tak i chočacca vieści samyja ciopłyja razmovy. Tut dźvie maleńkija ŭtulnyja zały. Interjer toj, što na pieršym paviersie, davoli prosty: maleniečkija stoliki, lohkija i śvietłyja kolery ścienaŭ — usio davoli zvyčajna, ale pryjemna. Našmat pryhažejšaja zała mieścicca nižej. Tam, pad sklapieńniami starych stolaŭ, svaich haściej čakajuć miakkija vuhłavyja kanapy, mnostva padušak i śviečki. Adzinaje, što krychu sapsuje ramantyku minułych stahodździaŭ, sučasnaja muzyka telekanała Europa+.

Karaciej kažučy, kali vy chočacie papić kavy z desiertam i majecie na heta chvilin 20, raju vam naviedać zału na pieršym paviersie. Kali chočacie prypynić čas i atrymać asałodu ad razmovy ź cikavaj asobaj, spuskajciesia nižej.

Mieniu i ceny

Treba skazać, što «Fierź» prapanuje nie tolki kavu ci harbatu z adpaviednych kart, ale i šmat čaho inšaha: pieršyja i druhija stravy, harniry i desierty. Jość tut i davoli bahaty vybar ałkaholnych i biezałkaholnych kaktejlaŭ.

Naturalna, ceny tut davoli vysokija. Naprykład:

Čyzkiejk tvarahovy (100 h.) — 25 000 r.

Štrudel jabłyčny (100 h.) — 22 000 r.

Łate (200 mł) — 24 000 r.

Amierykana (150 mł) — 13 000 r.

Pry tym, što čyzkiejk i štrudel byvali i smačniejšyja.

Majo mierkavańnie

«Fierź» — dobry prykład taho, jakija ŭstanovy pavinnyja raźmiaščacca ŭ samym sercy staroha horada: pryjemnaja abstanoŭka, cikavy interjer i smačnaja kava. Niahledziačy na davoli vysokija ceny, raju naviedać. Mienavita takija kaviarni dadajuć horadu atmaśfiernaści i ŭtulnaści, jakoj staromu Minsku tak nie chapaje.

Mabyć, kaliści źjaviacca pryhožyja prajekty pa adnaŭleńni zabudovy ŭ rajonie płoščy 8 sakavika… Źniknie savieckaja Niamiha, i na jaje miescy niby z popiełu paŭstanie Rakaŭskaje pradmieście. Kaścioł Śviatoha Jazepa budzie sustrakać viernikaŭ, a kožny turyst budzie čuć asablivuju miełodyju zvanoŭ, niby žyvy hołas staroha Minska. Žadajem rodnamu horadu najchutčejšaha akryjańnia!

• 0
• 0
• 0
• 0
• 0
• 0
• 0
• 0