Lidarka novych pravych Francyi: što Maryna Lo Pen mianiaje ŭ partyi?

Za jaje prahałasavała bolš za 6 miljonaŭ francuzaŭ, što źjaŭlajecca histaryčnym rekordam Nacyjanalnaha Frontu.

Adrazu paśla pieršaha turu ŭsie “levyja” kandydaty ŭ prezidenty padtrymali sacyjalista Fransua Alanda. Maryna Lo Pen rabić taki padarunak Nikala Sarkazi admoviłasia. Dziva što -- u vyniku parazy Sarkazi jana maje šancy stać novym tvaram francuzskaj “pravaj” apazicyi.

Palityčny start

U 18 hod Maryna Lo Pen zrabiła dla siabie dźvie važnyja rečy: pastupiła ŭ najlepšy jurydyčny ŭniviersitet Francyi i dałučyłasia da Nacyjanalnaha Frontu. Zdabyŭšy jurydyčnuju adukacyju, Maryna Lo Pen šeść hadoŭ pracavała advakatam (što cikava, časta baroniačy intaresy nielehalnych imihrantaŭ). Adnak u 30 hadoŭ Maryna Lo Pen całkam syšła ŭ palityku. Dziakujučy svajmu talentu i baćkoŭskaj padtrymcy, Maryna Lo Pen chutka pabudavała partyjnuju karjeru, zajmajučy pa čarzie ŭsie mahčymyja pasady ŭ partyi, a hod tamu stała nastupnicaj svajho baćki na pasadzie kiraŭnicy Nacyjanalnaha Frontu.

Reforma Maryny Lo Pen

Kali paraŭnoŭvać Nacyjanalny Front ŭ časy kiravańnia Žan-Mary i Maryny Lo Pen, to zaŭvažna, što jana nie farmalny lidar, a sapraŭdy novy hołas na francuzskaj palityčnaj scenie. Kali Nacyjanalny Front jašče niekalki hadoŭ tamu bieź pierabolšvańniaŭ byŭ spłavam nacyjanalistaŭ (typu Žyrynoŭskaha ŭ Rasii), fašystaŭ, manarchistaŭ i jeŭraskieptykaŭ, abjadnanych nieluboŭju da libieralnaj demakratyi, to siońnia Nacyjanalny Front starajecca pieraŭtvarycca ŭ narmalnuju pravuju partyju, prymalnuju dla bolšaści. Nie šmat ludziej u Francyi vieryć Marynie Lo Pen, što jana moža być inakšaj ad svajho baćki, adnak 18% hałasoŭ u pieršym tury śviedčać ab słušnaści abranaha šlachu. Takija temy, jak isłamizacyja Jeŭropy, časta vykarystoŭvajucca Marynaj, ale ŭ paraŭnańni sa svaim baćkam jana nie robić staŭki na ksienafobiju.

Pravaabarončaja kampanija Licra raźmiaściła ŭ internecie rolik, na jakim Maryna Lo Pen paśla źniaćcia makijažu pieraŭtvarajecca ŭ svajho baćku.

Ideałohija Lo Pen

Niahledziačy na źmieny ŭ Nacyjanalnym Froncie, ideałohija Maryny Lo Pen zastajecca takoj ža papulistyčnaj, jak i ŭ jaje tatki. Maryna Lo Pen časta hučyć, jak łukašenkaŭski prapahadyst: jana havoryć ab poŭnym pravale Jeŭrasajuza, vystupaje za vychad Francyi z NATA i hieapalityčny sajuz z Rasijaj. Varta zaznačyć, što Nacyjanalny Front zaŭsiody mieŭ svajesablivy pohlad na zamiežnuju palityku – antysiemicki i antyamierykanski. Naprykład, Žan-Mary Lo Pen ŭ 1990 hodzie naviedvaŭ Sadama Chusejna ŭ Bahdadzie, a paśla nazyvaŭ jaho svaim siabram. Siońniašniaja kiraŭnica, Maryna Lo Pen, letaś krytykavała rašeńnie Paryža dapamahčy livijskim paŭstancam. Dla Maryny Lo Pen Uładzimir Pucin -- abjekt zachapleńnia, a partniorstva z Rasijaj jana ŭsprymaje jak svoj palityčny pryjarytet.

Budučynia Lo Pen

Kali Maryna Lo Pen vučyłasia ŭ škole, to jejnyja nastaŭniki jaje nie lubili ŭžo za toje, što jana źjaŭlajecca dačkoj čałavieka, jaki ličyć Chałakost razdźmutym mifam. Kali Maryna Lo Pen šukała miesca pracy, to joj časta admaŭlali, bo nie mahli źmirycca, što jejny baćka “pa-siabroŭsku” nazyvaje Hitlera “dziadźkam Dolfikam”. Siońnia Maryna Lo Pen mahła b pretendavać na našmat bolšaje, kali b za śpinoj nie stajaŭ jejny baćka. Pośpiech Maryny Lo Pen budzie zaležyć ad taho, nakolki jana zdoleje vyzvalicca ad spadčyny svajho baćki, idei jakoha dyskredytavany, choć stvoranaja im palityčna siła vyžyła.

• 0
• 0
• 0
• 0
• 0
• 0
• 0
• 0