Łukašenka vyhaniaje pasłoŭ ES i Polščy, adklikaje svaich

U zajavie načalnika ŭpraŭleńnia infarmacyi — pres-sakratara MZS Biełarusi Andreja Savinych im prapanujecca «davieści svajmu kiraŭnictvu ćviorduju pazicyju biełaruskaha boku ab nieprymalnaści cisku i sankcyj». Taki krok aficyjny Minsk zrabiŭ u adkaz na rašeńnie Rady ES pašyryć śpis biełaruskich čynoŭnikaŭ, u dačynieńni da jakich dziejničajuć vizavyja abmiežavańni.

U svaju čarhu, u Minsk dla kansultacyj adklikany pastajanny pradstaŭnik Biełarusi pry Jeŭrasajuzie Andrej Jeŭdačenka i ambasadar Biełarusi ŭ Polščy Viktar Hajsionak.

«Rašeńnie Rady ES havoryć pra toje, što Jeŭrasajuz praciahvaje prytrymlivacca palityki adkrytaha cisku. My nieadnarazova na ŭsich uzroŭniach tłumačyli bieśpierśpiektyŭnaść takoj palityki ŭ adnosinach z Respublikaj Biełaruś», — havorycca ŭ zajavie MZS Biełarusi.

Taksama adznačajecca, što «ŭ adkaz biełaruski bok zakryje ŭjezd u Biełaruś tym asobam z krain Jeŭrasajuza, jakija sadziejničali ŭviadzieńniu abmiežavalnych mier».

«U vypadku praciahu cisku na Respubliku Biełaruś buduć pryniaty i inšyja miery dla abarony našych intaresaŭ, — adznačyŭ Andrej Savinych.

«Prapanovy Biełarusi ab raźvićci dyjałohu, uzajemadziejańnia i supracoŭnictva ź Jeŭrapiejskim Sajuzam na asnovie pryncypaŭ raŭnapraŭja i ŭzajemnaj pavahi zastajucca ŭ sile», — adznačajecca ŭ zajavie.

Jak viadoma, učora Rada ES dabaviła da śpisa nieŭjaznych u krainy sajuza jašče 21 łukašenkaŭca — siłavikoŭ i sudździaŭ, datyčnych da niapraviednych prysudaŭ biełarusam. U svaju čarhu, u Biełarusi ŭ piatnicu 24 lutaha byŭ vyniesieny prysud viciebčuku Siarhieju Kavalenku: bolš za dva hady turmy. Vina hetaha 37-hadovaha budaŭnika była ŭ tym, što jon vyviesiŭ bieł-čyrvona-bieły ściah u Viciebsku.

Adklikańnie pasłoŭ dla kansultacyj — heta adna z krajnich dypłamatyčnych mieraŭ.

Jašče ŭ 2008 hodzie ź Biełarusi byŭ anałahičnym čynam «vyšpurnuta» (vyraz Alaksandra Łukašenki) pasoł ZŠA.

U toj ža čas Jeŭropa nie vieryć, što Minsk maje mahčymaść nanieści joj surjoznuju škodu: «Biełarusi bolš patrebnaja Polšča i Jeŭrasajuz, čym naadvarot», — tak adkamientavaŭ dla radyjo «Svaboda» rašeńnie Łukašenki polski palitołah Vojciech Barodzič-Smalinski. Premjer-ministr Polščy Donald Tusk daviedaŭsia pra demarš biełaruskaha MZS padčas kanfierencyi, paviedamlaje partał onet.pl. Ministr nie chavaŭ svajho ździŭleńnia: «Tolki ciapier pra heta daviedaŭsia. Mnie ciažka kamientavać hetuju situacyju siońnia, a zaŭtra buduć kamientary ministra Sikorskaha. Naša pazicyja pa Biełarusi nie źmienicca», — skazaŭ Tusk.

• 0
• 0
• 0
• 0
• 0
• 0
• 0
• 0