Francuzski advakat patrabuje nieadkładna aryštavać Kulašova. «Šancy vysokija»

Francuzski advakat Uiljam Burdon u čaćvier padaŭ u Paryžy pazoŭ suprać prezidenta Biełarusi Alaksandra Łukašenki i kiraŭnika MUS Biełarusi Anatola Kulašova, abvinavačvajučy ich u katavańniach i žorstkim abychodžańni z hramadzianami paśla prezidenckich vybaraŭ u śniežni 2010 hoda, paviedamlaje ahienctva Frans Pres.

Burdon śćviardžaje, što jon pradstaŭlaje intaresy «achviaraŭ Alaksandra Łukašenki i jaho ministra ŭnutranych spraŭ».

Jon padaŭ pazoŭ padčas vizitu Kulašova, jaki ŭdzielničaje ŭ mierapryjemstvie, arhanizavanym ŭ štab-kvatery Interpoła ŭ Lijonie. Juryst patrabuje, kab Kulašova nieadkładna aryštavali i źmiaścili pad vartu, kab jon zastavaŭsia ŭ rasparadžeńni francuzskich uładaŭ.

«Heta vielmi terminovaja sprava, nieabchodna jak maha chutčej pryniać miery, kab pravieści rasśledavańnie i vyznačyć jahohuju adkaznaść za ŭčynienyja pravaparušeńni», — havorycca ŭ skarzie advakata, jaki taksama nakiravaŭ list ministru justycyi Francyi.

U śniežni 2010 hoda Łukašenka raspačaŭ svoj čaćviorty termin u jakaści prezidenta. Šmattysiačnaja akcyja pratestu była žorstka razahnanaja. U źniavoleńni apynulisia 700 čałaviek. Za kratami apynulisia praktyčna ŭsie kandydaty ŭ prezidenty. Da hetaha času adbyvajuć pakarańnie ŭ kałonii byłyja kandydaty na pasadu kiraŭnika dziaržavy Mikałaj Statkievič i Andrej Sańnikaŭ, a taksama davieranaja asoba adnaho z kandydataŭ Źmicier Bandarenka.

Jak paviedamlaje Charter97.org, Burdon dziejničaje ad imia inicyjatyvy Free Belarus Now («Vyzvalić Biełaruś siońnia»), u jakuju abjadnalisia ŭdava źnikłaha, imavierna, zabitaha biznesoŭca Krasoŭskaha, siastra źniavolenaha eks-kandydata ŭ prezidenta Sańnikava dy inšyja biełarusy, što žyvuć za miažoj. Paviedamlajecca, što hety metr daŭno śpiecyjalizujecca na spravach ab złačynstvach suprać čałaviečnaści. Jon vioŭ spravy suprać Pinačeta, Kadafi, Chabre, Miłošaviča. Burdon taksama pradstaŭlaje siemji niekatorych francuzskich viaźniaŭ amierykanskaj turmy ŭ zalivie Huantanama (Kuba).

«Šancy, što spadara Kulašova aryštujuć, davoli vysokija, i my na heta raźličvajem», — adznačyła pamočnik advakata.

Jana nie skazała, čyje mienavita intaresy pradstaŭlaje advakat. Viadoma tolki, što advakat Burdon dziejničaje ad imia piaci biełarusaŭ. Hramadzianskaja inicyjatyva Free Belarus Now raspaŭsiudziła zajavu ab tym, što Burdon dziejničaje ad jaje imia. Inicyjatyva Free Belarus Now zasnavana siemjami apazicyjnych palitykaŭ i žurnalistaŭ, jakija byli aryštavany padčas razhonu demanstracyi 19 śniežnia 2010 hoda ŭ Minsku.

• 0
• 0
• 0
• 0
• 0
• 0
• 0
• 0