Bo ŭžo sabrana 120 tysiač podpisaŭ.
U piatnicu kandydat ad Abjadnanaj hramadzianskaj partyi Jarasłaŭ Ramančuk prezientavaŭ sabranyja podpisy. Ich užo kala 120 tysiač, tamu nie vyklučana, što bližejšym časam zbor podpisaŭ za hetaha kandydata spynicca z metaj ekanomii siłaŭ i srodkaŭ.
Staršynia AHP Anatol Labiedźka ličyć, što zbor podpisaŭ prademanstravaŭ moc partyi. «Taksama my akazali humanitarnuju dapamohu dvum inšym kandydatam — Uładzimiru Niaklajevu i Andreju Sańnikavu. Na jakich taksama pracavali našy partyjcy», — skazaŭ A.Labiedźka. Tym nie mienš, nichto nie admianiaŭ rašeńnia palitrady AHP ab spynieńni ci prypynieńni siabroŭstva ŭ partyi, u vypadku pracy na inšaha kandydata.
Labiedźka ličyć, što realnaja kolkaść zarehistravanych kandydataŭ i tych, chto sabraŭ nieabchodnuju kolkaść podpisaŭ, moža nie supadać. U pryvatnaści, jon pryvioŭ u prykład Viktara Ciareščanku, zborščykaŭ podpisaŭ za jakoha nichto nie bačyŭ.
Kiraŭnik štabu Leŭ Marholin zaznačaje, što ludzi vielmi aktyŭna padpisvalisia za ich kandydata. «Častka padpisvałasia śviadoma tolki za Ramančuka, a inšyja — za ŭsich apazicyjnych kandydataŭ», — kaža Ł.Marholin. U jaho rodnym Barysavie za Ramančuka ŭdałosia sabrać 2500 podpisaŭ.
Anatol Paŭłaŭ, jaki kaardynavaŭ pracu inicyjatyŭnaj hrupy, kaža, što najmienšyja pakazčyki dała Homielščyna. Heta ŭvohule niejki začaravany rehijon, bo padpisvacca nie chočuć ni za kaho z kandydataŭ. Zatoje dobryja pakazčyki na Mahiloŭščynie, asabliva ŭ Babrujsku. Udałosia vyjści na naležny ŭzrovień na Viciebščynie.
Aleh Korban byŭ kiraŭnikom hrupy pa zbory podpisaŭ u Minsku. Aleh kaža, što ŭdałosia sabrać 40 tysiač. «Pravakacyj nie było. Pracavali ŭ miry i zhodzie», — kaža A.Korban.Darečy, pa słovach Aleha ŭ inicyjatyŭnaj hrupie ŭ Minsku pracavali siabry AHP, BSDP, navat KCHP‑BNF, ale nivodnaha čałavieka z «Spraviadlivaha śvietu».
Darečy, Anatol Paŭłaŭ, jaki ŭznačalvaje minskuju haradskuju strukturu partyi, choča, kab Korban staŭ jahonym źmienščykam na hetaj pasadzie.
Jarasłaŭ Ramančuk nie hublaje nadziei, što moža być vyłučany adziny ad apazicyi. Ale heta ŭžo adbudziecca paśla rehistracyi kandydataŭ.
Kali havorka zajšła pra źniaćcio na karyść Niaklajeva, to Labiedźka zaznačyŭ, što ŭ ich niama «lubimych kandydataŭ». A Paŭłaŭ dadaŭ, što ŭ demakratyčnym łahiery «ŭ AHP niama antahanistaŭ».
Pres‑sakratar kandydata Hanna Krasulina zaznačyła, što Ramančuk sam aktyŭna prymaŭ udzieł u zbory podpisaŭ.
«Hałoŭnaje ŭražańnie ad kampanii — ludzi hublajuć strach», — skončyŭ vystup Jarasłaŭ Ramančuk.
Kamientary