Milinkievič vyznačycca z udziełam u vybarach paśla abviaščeńnia ich daty
Lider ruchu «Za Svabodu», pretendent u prezidenty Alaksandr Milinkievič vyznačycca sa svaim udziełam u prezidenckaj kampanii paśla abjaŭleńnia daty vybaraŭ. Pra heta BiełaPAN paviedamiŭ namieśnik staršyni ruchu «Za Svabodu» Juryj Hubarevič.
Pavodle jaho słoŭ, 8 vieraśnia adbyłosia pasiadžeńnie rady ruchu. U im udzielničali 16 pradstaŭnikoŭ arhanizacyi z usich rehijonaŭ Biełarusi.
«Alaksandr Milinkievič u vystupleńni adznačyŭ, što padčas prezientacyi svajoj pieradvybarnaj prahramy ŭ mai hetaha hoda jon pastaviŭ umovaj svajho ŭdziełu ŭ vybarach źmieny ŭ zakanadaŭstva, jakija b harantavali niezaležnym kandydatam prava na ŭklučeńnie svaich pradstaŭnikoŭ u vybarčyja kamisii ŭsich uzroŭniaŭ. Hetyja prapanovy byli nakiravany ŭ Pałatu pradstaŭnikoŭ, ABSIE, Biuro pa demakratyi i pravach čałavieka ABSIE i Jeŭraparłamient. Adnak z klučavoha orhana, zdolnaha pryniać rašeńnie pa hetym pytańni, — biełaruskaha parłamienta, adkazu pakul niama», — adznačyŭ Hubarevič.
U vyniku radaj pryniata rašeńnie vyznačycca z udziełam Alaksandra Milinkieviča ŭ vybarach u jakaści pretendenta ŭ prezidenty paśla aficyjnaha pryznačeńnia daty vybaraŭ.
«Situacyja ŭ Biełarusi mianiajecca kožnuju chvilinu,
i ŭ zaležnaści ad źmianieńnia situacyi my budziem vyrašać, ci metazhodna Milinkieviču iści ŭ prezidenty abo hetaha rabić nie varta. Siońnia my analizujem lubyja varyjanty raźvićcia padziej, až da admieny vybaraŭ», — skazaŭ Hubarevič.
Tym nie mienš, pavodle jaho słoŭ, ruch «Za Svabodu» budzie vieści pieramovy z «nacyjanalna adkaznymi siłami» ab sumiesnych dziejańniach padčas vybarčaj kampanii. «Heta tyčycca vyłučeńnia naziralnikaŭ na vybarčyja ŭčastki i vyłučeńnia svaich ludziej u skład vybarčych kamisij», — zajaviŭ Hubarevič.
Treba adznačyć, što ŭ pasiadžeńni rady ruchu «Za Svabodu» ŭdzielničaŭ jašče adzin pretendent u prezidenty — Ryhor Kastusioŭ, jaki maje namier bałatavacca ad Partyi BNF. Jak rastłumačyŭ Hubarevič, Kastusioŭ źjaŭlajecca členam rady ruchu «Za Svabodu».
Čamu YouTube vydaliŭ kanały BiełTA, STB i ANT? Voś što viadoma11
Kamientary