Siamja Łukašenkaŭ u topie. Chto papularny ŭ ruskaj Vikipiedyi?
Kali ŭ biełaruskamoŭnaj Vikipiedyi ŭ topie apynulisia prarasijskija aktyvisty i dziejačy kultury, to ruskamoŭny siehmient demanstruje zusim inšyja pryjarytety. Tut daminuje cikavaść da pradstaŭnikoŭ ułady, pop-kultury i svajakoŭ Alaksandra Łukašenki.
Pra heta śviedčać źviestki daśledavańnia «Ličbavy baromietr Biełarusi», aŭtary jakoha praanalizavali statystyku naviedvalnaści staronak za 2025 hod. Daśledčyki nazyvajuć hety mietad «proksi-sacyjałohijaj»: va ŭmovach adsutnaści niezaležnych apytańniaŭ ličbavyja ślady karystalnikaŭ pakazvajuć realny, a nie dekłaravany intares hramadstva.
Pra kaho čytajuć pa-rusku?
Biezumoŭnym lidaram u ruskamoŭnym siehmiencie zastajecca Alaksandr Łukašenka — jaho bijahrafiju adkryvali bolš za 1 miljon razoŭ (1 002 254).
Adrazu za im idzie papularny jutubier Uład A4 (576 527 prahladaŭ) i tenisistka Aryna Sabalenka (574 725).
Admietna, što čaćviortaje miesca ŭ rejtynhu zajmaje Mikałaj Łukašenka. Artykułam pra małodšaha syna palityka cikavilisia bolš za 300 tysiač razoŭ. Heta bolš, čym prahlady staronak Maksa Karža (5‑ie miesca) abo Siarhieja Cichanoŭskaha (6‑ie miesca).
U dziasiatku taksama trapili maci Mikoły Łukašenki i hałoŭnaja doktarka balnicy Kiraŭnictva spraŭ prezidenta Iryna Abielskaja, demakratyčnaja lidarka Śviatłana Cichanoŭskaja, kiraŭnik NAK Viktar Łukašenka i śpiavak Dźmitryj Kałdun.
Pry hetym analityki fiksujuć ahulnaje źnižeńnie cikavaści da biełaruskaj palityki. U paraŭnańni z 2023 hodam prahladaŭ stała mienš: pakazčyki Cichanoŭskaj źnizilisia na 11,4%, a Łukašenki — na 18,1%. Prezidenckaja kampanija-2025 nie vyklikała istotnaha ŭsplosku ŭvahi, akramia karotkaterminovych zapytaŭ pa proźviščach kandydataŭ-spojleraŭ.
Anhłamoŭny śviet: tolki sport
Zusim inšuju karcinu pakazvaje anhłamoŭnaja «Vikipiedyja». Dla hłabalnaj aŭdytoryi Biełaruś — heta pieradusim sport.
Absalutnaj rekardsmienkaj tut stała Aryna Sabalenka z kaśmičnaj ličbaj amal 6 miljonaŭ prahladaŭ (5 991 367). Heta ŭ šeść razoŭ bolš, čym u Alaksandra Łukašenki ŭ tym ža moŭnym raździele (857 tysiač). Treciaje miesca zajmaje jašče adna tenisistka — Viktoryja Azaranka. Palityčnyja fihury, vidavočna, cikaviać anhłamoŭny śviet značna mienš.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty46
Kamientary
==========
Ruskija palityki papularnyja ŭ ruskaj viki, usio jak maje być