Pryncesy Ketryn i Šarłota syhrali duetam na kaladnym kancercie ŭ Łondanie

Pryncesa Uelskaja razam z dačkoj Šarłotaj vykanali fartepijanny duet na kaladnym kancercie, piša Bi-bi-si.

Jany vykanali tvor šatłandskaha kampazitara Erłanda Kupiera. Zapis byŭ zrobleny zahadzia ŭ Vindzorskim zamku na minułym tydni śpiecyjalna dla kaladnaj tranślacyi mierapryjemstva na kanale ITV1.

Kiensinhtanski pałac zaintryhavaŭ hledačoŭ pierad pačatkam prahramy, apublikavaŭšy videa, na jakim Ketryn i nieviadomy na toj momant muzykant ihrajuć na fartepijana, z podpisam «asablivy duet…».

Na zapisie jany siadziać va Unutranaj zale Vindzorskaha zamka za fartepijana i vykonvajuć Holm Sound — tvor, jaki, jak viadoma, im dobra znajomy i jaki jany z zadavalnieńniem hrajuć razam doma.

Pryncesa Uelskaja hrała tolki levaj rukoj, a Šarłota — tolki pravaj.Muzyčny numar supravadžaŭsia kadrami prybyćcia haściej na kaladnuju słužbu: prync Uelski i Ketryn nazirali, jak ich dzieci pryviazvali papiarovyja stužački sa svaimi imionami da «dreva suviaziaŭ» zvonku abactva, što simvalizuje adzinstva, dabryniu i ahulnyja kaštoŭnaści.

U zakadravym tekście videa Ketryn kaža:

«Pa svajoj sutnaści Kalady kažuć pra luboŭ, jakaja prajaŭlajecca ŭ samych prostych i čałaviečych formach. Nie ŭ sientymientalnych ci hrandyjoznych žestach, a ŭ piaščotnych. U momancie, kali ciabie słuchajuć. U słovie suciašeńnia. U siabroŭskaj razmovie. U ruce dapamohi. U prysutnaści. Hetyja prostyja prajavy kłopatu mohuć zdavacca niaznačnymi, ale jany robiać svoj uniosak u cudoŭnuju mazaiku žyćcia, da jakoj my ŭsie naležym».

Dla Ketryn, jakaja zdała ekzamieny pa fartepijana i muzyčnaj teoryi, heta nie pieršy dośvied vystupleńnia na kaladnym kancercie. Na pieršym kancercie Together at Christmas u 2021 hodzie jana niečakana dla publiki akampaniravała na fartepijana śpievaku i aŭtaru piesień Tomu Uokieru padčas vykanańnia jaho kaladnaj kampazicyi For Those Who Can't Be Here («Dla tych, chto nie moža być tut»).

Arhanizatary paviedamili, što tema sioletniaha mierapryjemstva — «siła lubovi i adzinstva» — była vybrana ŭ znak pryznańnia ŭniosku ludziej pa ŭsioj krainie ŭ raźvićcio hramadstva. Pavodle ich słoŭ, u śviecie, jaki ŭsio čaściej adčuvajecca raźjadnanym, śviata zaklikana nahadać pra kaštoŭnaść lubovi va ŭsich jaje prajavach.

Jak adznačajecca, uklučeńnie dueta ŭ prahramu stała asabistaj inicyjatyvaj Ketryn i pavinna było padkreślić važnaść čałaviečych suviaziaŭ.

«Toj čas, kłopat i spačuvańnie, jakija vy dorycie — časta cicha, biez słoŭ i biez čakańnia pryznańnia, — akazvajuć sapraŭdy vielizarny ŭpłyŭ na žyćcio inšych», — napisała pryncesa ŭ liście, układzienym u kožny asobnik prahramy słužby.

• 3
• 0
• 0
• 0
• 0
• 0
• 0
• 2