«Ja taja samaja ŭ futry». Maładaja švačka pracavała ŭ futry, pakul dziaržTB raskazvała, što na fabrycy ŭ Žłobinie nie choładna
Paśla skarhaŭ na choład na šviejnaj fabrycy ŭ Žłobinie dziaržTB źniało siužet, kab pakazać, što «ŭsio narmalna», ale atrymałasia naadvarot. Rabotnica, jakaja trapiła ŭ kadr u futry, raskazała paśla krychu pra siabie ŭ sacsietkach.
Usio pačałosia sa skarhi rabotnic šviejnaj fabryki ŭ Žłobinie na žachlivy choład u cechach pradpryjemstva. Pavodle ich słoŭ, tempieratura trymajecca na ŭzroŭni 10 hradusaŭ, i pracavać u takich umovach vielmi ciažka.
Paśla skarhaŭ dziaržTB vypuściła repartaž z fabryki. Prapahandysty chacieli pierakanać, što z tempieraturaj usio narmalna. Na fabryku pryjechała pravierka. Kantralor zajaviŭ, što ŭ cechu nie 10 hradusaŭ, a 18. Ale pakolki heta ŭsio roŭna na 2 hradusy nižej za normu, kiraŭnictvu zahadali vypravić situacyju.
Pry hetym adna z rabotnic, jakuju pakazali ŭ siužecie, vymušana była pracavać u futry. Jana pryznałasia, što joj choładna, tamu davodzicca ŭciaplacca. Adzieńnie vyhladała zanadta ciopłym dla «18 hradusaŭ». Paskardziłasia na choład i inšaja supracoŭnica — jana pracavała ŭ viazanaj kofcie.
Dyrektar fabryki paabiacała ŭvieści dadatkovyja pierapynki, kab supracoŭnicy mahli «pahrecca kala mikrachvalovak i čajnikaŭ» u pakoi dla pryjomu ježy.
Pra hetu situacyju raskazali ŭ tyktoku. U vyniku videa pabačyła adna z hieraiń repartažu — taja samaja dziaŭčyna ŭ zimovym adzieńni.
«Ja taja samaja ŭ futry. Pracuju tam. Zadavajcie pytańni», — napisała rabotnica ŭ kamientaryjach da videa. Hańnie 18 hadoŭ. Vyśvietliłasia, što na fabryku jana trapiła pa raźmierkavańni.
Dziaŭčyna ŭdakładniła ŭ kamientarach, što ŭ jaje pad futram jašče dźvie kofty.
Na prapanovu praciahvać skardzicca dalej rabotnica adkazała, što heta bieskarysna. Tamu, pavodle jaje słoŭ, «davodzicca ciarpieć i čakać zakančeńnia adpracoŭki».
Pry hetym dziaŭčyna adznačyła, što inšaj pracy ŭ Žłobinie šmat.
Kali ŭ jaje pacikavilisia zarobkam, švačka adkazała ščyra:
«Ja navat takija ličby bajusia nazyvać. Adzin raz u kramu schadzić, kupić papić — i chopić na hetym».
Karystalniki tyktoku ŭ bolšaści dziviacca, jak u takich umovach možna pracavać, i zaścierahajuć pra nastupstvy dla zdaroŭja. Niekatoryja rajać pasprabavać pieraraźmierkavacca, bo najmalnik nie vykonvaje ŭmovy pracy, prapisanyja ŭ kantrakcie.
Adna z žančyn dadała, što prablema na hetaj fabrycy isnuje dziesiacihodździami: jaje maci adpracavała na zhadanym pradpryjemstvie 40 hadoŭ.
«Zaŭsiody tam choładna było, jak ni apranisia. A jašče niama marazoŭ. A raniej na samaj spravie było 10 hradusaŭ», — reziumavała jana.
«Naša Niva» — bastyjon biełaruščyny
PADTRYMAĆCiapier čytajuć
«Dahetul zadajusia pytańniem, čym Pratasievič mianie začaravaŭ». Vialikaje intervju Sofji Sapiehi — častka druhaja4
Kamientary