«Я тая самая ў футры». Маладая швачка працавала ў футры, пакуль дзяржТБ расказвала, што на фабрыцы ў Жлобіне не холадна
Пасля скаргаў на холад на швейнай фабрыцы ў Жлобіне дзяржТБ зняло сюжэт, каб паказаць, што «ўсё нармальна», але атрымалася наадварот. Работніца, якая трапіла ў кадр у футры, расказала пасля крыху пра сябе ў сацсетках.
Усё пачалося са скаргі работніц швейнай фабрыкі ў Жлобіне на жахлівы холад у цэхах прадпрыемства. Паводле іх слоў, тэмпература трымаецца на ўзроўні 10 градусаў, і працаваць у такіх умовах вельмі цяжка.
Пасля скаргаў дзяржТБ выпусціла рэпартаж з фабрыкі. Прапагандысты хацелі пераканаць, што з тэмпературай усё нармальна. На фабрыку прыехала праверка. Кантралёр заявіў, што ў цэху не 10 градусаў, а 18. Але паколькі гэта ўсё роўна на 2 градусы ніжэй за норму, кіраўніцтву загадалі выправіць сітуацыю.
Пры гэтым адна з работніц, якую паказалі ў сюжэце, вымушана была працаваць у футры. Яна прызналася, што ёй холадна, таму даводзіцца ўцяпляцца. Адзенне выглядала занадта цёплым для «18 градусаў». Паскардзілася на холад і іншая супрацоўніца — яна працавала ў вязанай кофце.
Дырэктар фабрыкі паабяцала ўвесці дадатковыя перапынкі, каб супрацоўніцы маглі «пагрэцца каля мікрахвалёвак і чайнікаў» у пакоі для прыёму ежы.
Пра гэту сітуацыю расказалі ў тыктоку. У выніку відэа пабачыла адна з гераінь рэпартажу — тая самая дзяўчына ў зімовым адзенні.
«Я тая самая ў футры. Працую там. Задавайце пытанні», — напісала работніца ў каментарыях да відэа. Ганне 18 гадоў. Высветлілася, што на фабрыку яна трапіла па размеркаванні.
Дзяўчына ўдакладніла ў каментарах, што ў яе пад футрам яшчэ дзве кофты.
На прапанову працягваць скардзіцца далей работніца адказала, што гэта бескарысна. Таму, паводле яе слоў, «даводзіцца цярпець і чакаць заканчэння адпрацоўкі».
Пры гэтым дзяўчына адзначыла, што іншай працы ў Жлобіне шмат.
Калі ў яе пацікавіліся заробкам, швачка адказала шчыра:
«Я нават такія лічбы баюся называць. Адзін раз у краму схадзіць, купіць папіць — і хопіць на гэтым».
Карыстальнікі тыктоку ў большасці дзівяцца, як у такіх умовах можна працаваць, і засцерагаюць пра наступствы для здароўя. Некаторыя раяць паспрабаваць пераразмеркавацца, бо наймальнік не выконвае ўмовы працы, прапісаныя ў кантракце.
Адна з жанчын дадала, што праблема на гэтай фабрыцы існуе дзесяцігоддзямі: яе маці адпрацавала на згаданым прадпрыемстве 40 гадоў.
«Заўсёды там холадна было, як ні апраніся. А яшчэ няма маразоў. А раней на самай справе было 10 градусаў», — рэзюмавала яна.
«Наша Нiва» — бастыён беларушчыны
ПАДТРЫМАЦЬЦяпер чытаюць
Папулярную тыктокерку з Лунінца, якая ратавала бяздомных жывёлінаў, асудзілі за палітыку1
Каментары