Zialenski: U Pakroŭsku 314 rasijskich vajskoŭcaŭ. Ukrainskija ŚMI: Heta šmat, Pakroŭsk syplecca

Pakroŭsk znachodzicca na miažy padzieńnia. Bai za Pakroŭsk doŭžacca amal paŭtara hady, ź lipienia 2024-ha. Stolki času spatrebiłasia rasijskaj armii, kab uziać 60‑tysiačny ŭkrainski horad pamieram z Kobryn. Heta pakazvaje abmiežavanaść patencyjału rasijskaj armii. Adnak heta ŭsio adno balučy momant dla Ukrainy i trahiedyja dla žycharoŭ. Jašče adzin horad Danbasa pieratvorany ŭ ruiny. 

Situacyja ŭ Pakroŭsku stała temaj bryfinhu prezidenta Ukrainy, jaki jon razam ź ministrami pravioŭ dla žurnalistaŭ 7 listapada. Tam jon, u pryvatnaści, zajaviŭ, što ŭ Pakroŭsku, pavodle źviestak vajskoŭcaŭ, znachodzicca 314 rasijskich vajskoŭcaŭ, situacyja składanaja, vojski RF ździejśnili bolš za 220 šturmaŭ za troje sutak, paviedamlaje ŭkrainskaje vydańnie «Suśpilnie».

Zialenski taksama dadaŭ, što sproby rasijskich vajskoŭcaŭ uziać Pakroŭsk nakiravanyja na demanstracyju prezidentu ZŠA Donaldu Trampu svajho pośpiechu na poli boju.

Raniej siońnia ŭdzień hałoŭnakamandujučy USU Alaksandr Syrski zajaŭlaŭ, što USU aktyvizujuć kontrudary ŭ rajonie horada Dabrapolle, kab asłabić cisk na Pakroŭsk.

Pavialičyć

Paśla lipieńskaj začystki rasijanie paŭtorna pranikli ŭ Pakroŭsk — heta adbyłosia pryblizna ŭ siaredzinie žniŭnia. Z taho času akupanty ŭtvaryli ŭ horadzie i vakoł jaho niekalki kropak nazapašvańnia, ź jakich jany ruchajucca dalej — u rajonie čyhunki, pamiž Pakroŭskam i Hryšynam, a taksama pa linii Dačanskaje-Novapaŭłaŭka-Hnatoŭka.

Čytajcie taksama: Prychavanaje praniknieńnie: jakija źmieny ŭ taktycy rasijskaj armii pakazaŭ šturm Pakroŭska?

Łahistyka da horada znachodzicca pad poŭnym kantrolem dronaŭ, ukrainskija vajskoŭcy iduć da pazicyj pa 10‑15 kiłamietraŭ pieššu. Situacyja bolš čym krytyčnaja, piša ŭkrainskaje vydańnie «Ukrainskaja praŭda».

Dvoje surazmoŭcaŭ «Ukrainskaj praŭdy» ŭ adnoj z bryhad, jakaja abaraniaje horad, paćvierdzili fakty rasstrełu rasijanami ŭkrainskich apierataraŭ BPŁA i ŭstupleńnia ŭ strałkovy boj artylerystaŭ i supraćtankistaŭ unutry horada. Va ŭkrainskich vajskoŭcaŭ zastajucca pazicyi i na poŭdzień ad Pakroŭska, adnak suviaź ź imi — minimalnaja. Častka pazicyj raźmieščanaja pamiž pazicyjami praciŭnika — takaja cieraspałosica ciapier charakternaja dla frontu. Častka pazicyj, adznačajuć ukrainskija žurnalisty, «uvohule falšyvyja — jany isnujuć na mapach, adnak na ich albo siadziać paranienyja vajskoŭcy, albo niama vajskoŭcaŭ u pryncypie. Ukrainskim abaroncam katastrafična brakuje piachoty».

«Piachota praktyčna adrezanaja ad kiravańnia. My ich čujem [pa racyi], starajemsia skidać vadzičku, ludzi pa 2,5—3 miesiacy na pazicyjach. Dla našaj bryhady — heta doŭha, bo my zaŭsiody staralisia pravodzić ratacyi. U samim Pakroŭsku, tolki z taho, što ja viedaju — 250 pi*araŭ, nasamreč, dumaju, ličba jašče bolšaja. Praktyčna na kožnaj vulicy bai, u nas štodnia jość 200 i 300. Vyvieści paranienych my nie možam, bo ŭ častcy pasadak užo praciŭnik. Cudam nam zranku ŭdałosia vyvieści dvuch piechacincaŭ, jakija dajšli da vakolic Pakroŭska, ale potym prylacieŭ FPV, i jany abodva ciažkija. Samaja vialikaja prablema — heta toje, što ciažka pravodzić łahistyku. Častku darohi možna pieraadoleć na aŭto, ale potym iści pieššu 10—15 kiłamietraŭ. I ŭvieś hety čas nieści BK (bojekamplekt), drony, praviziju. Usia daroha kantralujecca FPV-dronami na optavałaknie, vielmi šmat dronaŭ-čakalnikaŭ, dystancyjnaha minavańnia, na jakim štodnia chtości hinie. NRK (naziemny robat-kompleks) dali zanadta pozna», — raskazaŭ vydańniu vajskoviec.

«Spravy raźvivajucca pa najhoršym scenary. Pakroŭsk syplecca zanadta chutka, my takoha nie čakali. Na poŭnačy Mirnahrada jość trochi pi*araŭ, na poŭdni prasočvajucca małyja hrupy, ale ŭ cełym situacyja lepšaja, čym u Pakroŭsku», — padsumoŭvaje vydańnie.

Na bryfinhu Uładzimir Zialenski paviedamiŭ taksama, što Ukraina raspačynaje masavuju vytvorčaść ułasnych dronaŭ-mavikaŭ, a taksama vyvodzić u pryjarytety raspracoŭku evakuacyjnych dronaŭ.

• 1
• 0
• 1
• 3
• 0
• 21
• 0
• 0