«Pieršyja 5‑6 aŭtobusaŭ zaniatyja». Jak ciapier dabirajucca ź Biełarusi ŭ Polšču i nie tolki

Pahladzieli, jak paśla amal poŭnaha zakryćcia miažy Litvoj biełarusy dabirajucca ŭ ES.

Polšča: ad 6,5 hadzin da 6 sutak

Pa stanie na 18 hadzin 3 listapada ŭ čarzie na vyjezd ź Biełarusi ŭ Polšču staić amal 150 aŭtobusaŭ i 2685 lehkavych aŭto.

Padarožniki, jakija jechali ź Biełarusi ŭ Polšču siońnia ranicaj, kazali, što ŭ pieršych 5—6 aŭtobusach volnych miescaŭ nie było. I kali padsadžvacca ŭ aŭtobusy, jakija stajać dalej, to ŭ Polšču trapiš pryblizna praz sutki.

Kiroŭcy aŭtobusaŭ za padsadku biaruć ad 80 jeŭra z čałavieka.

Kali aŭtobusaŭ było kala 100, to kiroŭcy padličvali, što dabiracca da Polščy im daviadziecca da troch sutak. Vynikaje, što tyja, chto ciapier staić 140-m, vyjechać ź Biełarusi zmohuć tolki bližej da vychodnych. Praŭda, mnohija aŭtobusy stajać pustyja i nabirajuć pasažyraŭ užo pa miery nabližeńnia da punkta propusku.

Taksama niekatoryja pieravozčyki trymajuć svaje aŭtobusy ŭ čarzie, kab potym pierasadžvać tudy svaich pasažyraŭ, jakich da Brestu pryviazie inšy aŭtobus.

Na minułych vychodnych u ludziej, jakija jechali bieź pierasadak, sychodziła da 40 hadzin na čarhu i samo prachodžańnie miažy, ale tady i aŭtobusaŭ było da 100.

Bolš chutki varyjant

Niekatoryja padarožniki dzielacca historyjami, što vyhadniej iści na padsadku ŭ lehkavyja aŭto.

«Prachod miažy RB—PŁ siońnia zaniaŭ 6,5 hadziny, padsieŭ da ludziej u lehkavoje aŭto, u aŭtobus padsieści byŭ varyjant tolki ŭ piaty ci šosty, a heta vielmi doŭha. Na lehkavy našmat chutčej. Majcie na ŭvazie», — spravazdačyŭsia padarožnik, jakoha ranicaj padvieźli na aŭto ŭsiaho za 20 jeŭra.

Ale heta chutčej vyklučeńnie, bo za pierachod praź miažu zvyčajna biaruć ad 40 jeŭra.

Padsadka na aŭto sapraŭdy vyhladaje bolš chutkim varyjantam, bo ŭ ludziej, jakija minułaj nočču padsieli ŭ 5‑y aŭtobus, šlach da Polščy zaniaŭ 19,5 hadziny.

Što na aŭto?

Što tyčycca lehkavych aŭto, to za sutki z elektronnaj čarhi nakiroŭvajuć ad 400 da 500 mašyn, plus asobna iduć tyja, chto maje prava na pryjarytetny prajezd.

Padarožniki padličvajuć, što pry ciapierašnim tempie, zaniaŭšy miesca ŭ čarzie viečaram paniadziełka, trapić u Polšču možna nie raniej, čym praz 6 sutak, to bok u niadzielu viečaram.

Praz toje, što čarha ź lehkavych aŭto šalonaja, u pryhraničnych čatach rehularna źjaŭlajucca zapyty ab pošuku «pryjarytetu». My taksama raskinuli takija zapyty ŭ niekalkich čatach, ale nichto nie adhuknuŭsia.

Raniej, kali čarha pieravalvała adznaku ŭ 2000 aŭto, za pryjarytetny prajezd prasili ad 200 jeŭra (jak praviła, za takimi lhotnikami treba było jechać u niejki inšy nasieleny punkt) i da 250—300 jeŭra, kali čałaviek znachodziŭsia ŭ Breście i byŭ hatovy ŭ luby momant adpravicca ŭ padarožža.

Što na zvarotnym šlachu?

Ciaham dnia 3 listapada čarha ź lehkavych mašyn na vyjezd z Polščy ŭ Biełaruś abo adsutničała, abo ŭ niekatoryja pieryjady vyrastała da kala 50 aŭto.

Pavialičyć

Čarhi z aŭtobusaŭ z Polščy ŭ Biełaruś taksama niama, ale heta nie aznačaje, što niama zatrymki. Tak, padarožniki, jakija mieli bilety z Varšavy z vyjezdam a 23‑j hadzinie 2 listapada, vyjechali z polskaj stalicy tolki a 7:30 ranicy 3 listapada, bo aŭtobus źbiŭsia z raskładu praź vialikuju čarhu na miažy.

Łatvija

Na łatvijskim kirunku čerhaŭ z aŭtobusaŭ i lehkavych aŭto tradycyjna niama. Tym bolš što z 1 listapada Łatvija zabaraniła prajezd pa svajoj terytoryi dla turystyčnych aŭtobusaŭ ź Biełarusi i Rasii, pakinuŭšy tolki rehularnyja rejsy.

Ale chutka vyjechać u ES praz Łatviju nie atrymajecca. Ad 1 vieraśnia dziejničajuć novyja praviły ŭjezdu ŭ Łatviju: zamiežnik abaviazany zapoŭnić ankietu nie paźniej jak za 48 hadzin da pierasiačeńnia miažy.

Kali ankiety nie budzie, tearetyčna moža čakać štraf da 2000 jeŭra i departacyja. Heta datyčycca ŭ tym liku tranzitu pa terytoryi Łatvii pry zajeździe z Estonii i Litvy.

Aproč hetaha, u Łatvii zabaronieny ruch aŭto ź biełaruskimi numarami, tamu praz «Hryharoŭščynu» za sutki prajazdžaje kala 100—130 aŭto, što ŭ niekalki razoŭ mienš, čym praz «Kamienny Łoh», jakija pracujuć u abmiežavanym režymie.

Litva

Całkam zakrytym zastajecca pierachod «Bieniakoni», a praz «Kamienny Łoh» ź Biełarusi ŭ Litvu trapić možna, choć i nie ŭsim. Pierš za ŭsio praz hety pierachod jeduć hramadzianie ES i trymalniki litoŭskich DNŽ i PMŽ. Apošnimi dniami ź Biełarusi ŭ Litvu praz «Kamienny Łoh» prajazdžaje ad 249 da 388 aŭto, što navat bolš, čym časta było ŭ zvyčajnyja dni, kali pierachod pracavaŭ biez abmiežavańniaŭ.

• 1
• 1
• 1
• 2
• 4
• 2
• 1
• 0