Na plažy ŭ Aŭstralii znajšli butelku ź listami sałdat Pieršaj suśvietnaj vajny
Na ŭźbiarežžy Zachodniaj Aŭstralii niadaŭna było zroblena nievierahodnaje adkryćcio. Miascovy žychar Piter Braŭn i jaho dačka Fielisici znajšli butelku ź listami sałdat Pieršaj suśvietnaj vajny, jakaja pralažała ŭ piasku bolš za 100 hadoŭ, piša CNN.
9 kastryčnika siamja padčas prybirańnia plažu Uortan kala horada Eśpierans zaŭvažyła staruju šklanuju butelku Schweppes. Kali jaje adkryli, usiaredzinie akazalisia dva listy, napisanyja ałoŭkam u 1916 hodzie dvuma aŭstralijskimi sałdatami — 27‑hadovym Malkolmam Nieviłam i 37‑hadovym Uiljamam Charli.
Abodva pasłańni byli datavanyja 15 žniŭnia 1916 hoda, praz try dni paśla taho, jak ich karabiel HMAT A70 Ballarat vyjšaŭ z porta Adełaida i nakiravaŭsia da Francyi. Ich padraździaleńnie pavinna było ŭzmacnić 48‑y bataljon aŭstralijskaj piachoty, jaki vajavaŭ u Jeŭropie na Zachodnim froncie.
Nievił u svaim liście prasiŭ, kab, kali butelku znojduć, jaje pierasłali jaho maci — Rabiercinie Nievił, jakaja žyła ŭ maleńkim haradku Viłkavat. Jon pisaŭ:
«My cudoŭna pravodzim čas, ježa dobraja, chiba što adnu stravu my pachavali ŭ mory. Karabiel hojdaje i kidaje pa chvalach, ale my ščaślivyja, jak Łary» [vyraz «ščaślivy, jak Łary» — staraja aŭstralijskaja prymaŭka, jakaja aznačaje «vielmi ščaślivy». — Red.].
Harli, čyja maci ŭžo pamierła, dazvoliŭ tamu, chto znojdzie pasłańnie, pakinuć jaho sabie.
«Niachaj tamu, chto znojdzie hety list, budzie tak ža dobra, jak i nam ciapier», — napisaŭ jon.
Na svaich listach sałdaty paznačyli miescaznachodžańnie jak «Dzieści ŭ mory» i «Dzieści ŭ zalivie», majučy na ŭvazie Vialiki Aŭstralijski zaliŭ.
Paśla adpraŭki na vajnu losy vajskoŭcaŭ skłalisia pa-roznamu: Nievił zahinuŭ u bai praz hod, a Charli byŭ dvojčy paranieny, viarnuŭsia dadomu, ale pamior u 1934 hodzie ad raku, vierahodna z-za ŭździejańnia atrutnaha hazu na froncie.
Deb Braŭn, žonka Pitera, miarkuje, što butelka ŭsie hetyja hady nie płavała ŭ mory, a lažała ŭ piasku, i tolki niadaŭnija štarmavyja chvali vymyli jaje na pavierchniu. Niahledziačy na ŭzrost, papiera zachavałasia vielmi dobra, a napisanaje lohka čytajecca.
Dziakujučy hetamu siamja zmahła znajści svajakoŭ abodvuch sałdat.
Unučka Harli, En Ternier, pryznałasia, što była ŭražanaja:
«Heta sapraŭdny cud — niby naš dzied praciahnuŭ ruku praz čas i nahadaŭ pra siabie».
A Hierbi Nievił, praŭnuk Malkolma, adznačyŭ, što hetaja historyja abjadnała ŭsiu siamju:
«Jon, zdajecca, byŭ poŭny radaści, kali išoŭ na vajnu. Vielmi sumna, što ŭsio skončyłasia jaho hibiellu. Ale jakim ža jon byŭ čałaviekam!»
80‑hadovuju pasažyrku kruiznaha sudna zabylisia na trapičnym vostravie. Heta skončyłasia dla jaje trahična
U Aŭstralii akuła napała na padletka. Jaho vyratavali advažnyja siabry
U Kitai aŭstralijski film puścili ŭ prakat źmienienym z dapamohaj štučnaha intelektu. Hiej-paru pieratvaryli ŭ hieterasieksualnuju
Kamientary