Balšaviki adśviatkavali Pieršamaj pad śmiech minakoŭ

1 traŭnia biełaruskija balšaviki adśviatkavali mižnarodny dzień salidarnaści z pracoŭnymi. Sabraŭšysia, a 12-j la Akademii Navuk, jany prajšli šeściem na płošču Banhałor, dzie adbyŭsia karotki mitynh. Demanstranty imknulisia pryciahnuć da siabie ŭvahu z dapamohaj łozunhaŭ: «Buržujaŭ — na nary, rabočych — na Kanary». Byli i bolš radykalnyja, kštałtu «Našy Mihi siadut v Rihie, našy tanki snova v Prahie!» dy «Pytać i viešać, viešać i pytać».

Udzielnikaŭ pieršatravieńskaha šeścia było niašmat — kala 60-ci čałaviek. Niahledziačy na heta, jano było vyrazna padzielenaje pa ŭzrostavaj prykmiecie. Uznačalvała kałonu staraja hvardyja z partretami Lenina i Stalina, čyrvonymi raściažkami dy harmonikam, a zamykała maładaja balšavisckaja hienieracyja — pradstaŭniki nacyjanał-balšavickaj partyi, filijała rasijskaj.

Pieršyja pa darozie ŭ park Družby narodaŭ śpiavali staryja savieckija pieśni, a nacboły raznastajnymi sposabami imknulisia pryciahnuć da siabie ŭvahu minakoŭ. Hałoŭnym čynam z dapamohaj łozunhaŭ: «Adabrać i padzialić!», «Buržujaŭ — na nary, rabočych — na Kanary», «Boh kazaŭ dzialicca!». Byli i bolš radykalnyja, zapazyčanyja ŭ rasijskich «limonaŭcaŭ»: «Našy Mihi siadut v Rihie, našy tanki snova v Prahie!», «My mańjaki, my dakažam» dy «Pytać i viešać, viešać i pytać».

Padčas mitynhu na płoščy Banhałor vystupoŭcy krytykavali kantraktnuju sistemu i biezabaronnaść pracoŭnych pierad najmalnikami. Vystupy nahadvali najlepšyja ŭzory sacyjalistyčnaha aratarskaha majsterstva najhoršych časoŭ.

«Kantraktnaja sistema — heta dubina dla rabočaha kłasa», «My zaklikajem svabodalubnyja narody paŭstać suprać amierykanskaha impieryjalizmu» — padobnymi tezami byli napoŭnienyja pałymianyja zvaroty arataraŭ da tych niekalkich dziesiatkaŭ čałaviek, što zdoleli dajści da miesca praviadzieńnia mitynhu.

Bolš kankretnym akazaŭsia vystup nacyjanał-balšavikoŭ. Jany vykazali svaju niezadavolenaść palitykaj biełaruskich uładaŭ, zajaviŭšy, što ŭ Biełarusi «čałaviek siońnia — rab» i zaklikali da praviadzieńnia supolnych akcyj i demanstracyj. «Tolki supolnymi šmatludnymi akcyjami my zmožam damahčysia ŭpłyvu ŭ Biełarusi», — skončyŭ svoj vystup pradstaŭnik biełaruskich prychilnikaŭ Eduarda Limonava.

Naprykancy prysutnyja adzinahałosna pryniali rezalucyju ab salidarnaści usich levych sił Biełarusi ŭ baraćbie z antyčałaviečnym kursam i novym amierykanskim nieafašysckim režymam, asudzili niežadańnie minskich uładaŭ viarnuć u horad pomnik Stalinu i raskrytykavali ideju rasijskich uładaŭ pravieści parad na Krasnaj płoščy supolna z pradstaŭnikami vojskaŭ sajuźnikaŭ u II suśvietnaj vajnie.

«Adpravim hłabalny kapitalizm na zvałku! Za sacyjalistyčnuju Biełaruś! Ura, tavaryšy!» — hučna kryčali niešmatlikija balšaviki ŭ parku Družby narodaŭ, vyklikajučy nieprychavany śmiech ŭ minakoŭ.

• 0
• 0
• 0
• 0
• 0
• 0
• 0
• 0