Biełaruska Kaciaryna Mamlina, jakaja žyvie ŭ Francyi, stała kiraŭnicaj zamka Kastel Navel, jaki znachodzicca niedaloka ad horada Bryŭ-ła-Hajard u departamiencie Karez, rehijon Novaja Akvitanija. Pra heta paviedamlaje sajt «Biełaruś i mir».
Naša suajčyńnica, jakaja zachaplajecca ŭsim staradaŭnim, pierajechała ŭ Paryž u junackim uzroście, kab praciahnuć vyvučeńnie historyi mastactvaŭ.
Paznajomiŭšysia z horadam i dobra paznaŭšy jaho, dziaŭčyna pracavała hidam dla zamiežnych turystaŭ. Pastupova stała adkryvać dla siabie cudoŭnyja histaryčnyja słavutaści krainy, a paśla adnojčy, całkam vypadkova, naviedała Karez i zakachałasia ŭ jaho.
Paśla pandemii COVID-19 Kaciaryna vyrašyła kinuć usio i ŭładkavacca žyć tut.
Spačatku žančyna pracavała pradavačkaj. Ale luboŭ da historyi nie pakinuła jaje. Tamu praz peŭny čas Kaciaryna ŭładkavałasia na pracu ŭ zamak Kastel Navel, paśla stała kiravać susiednim zamkam Ciuren, i narešcie viarnułasia ŭ Kastel Navel užo jak dyrektarka.
Hety zamak upieršyniu zhadvajecca ŭ histaryčnych dakumientach u XIII stahodździ. Samaja staraja častka była ŭźviedziena ŭ siarednija viaki, paśla z časam dadavałasia astatniaje. Užo bližej da ciapierašniaha času budynki rekanstrujavalisia.
Padčas Stohadovaj vajny zamak časova zachoplivali anhličanie. Kala 350 hadoŭ jon znachodziŭsia va ŭłasnaści rodu Abiuson. Adnym z apošnich uładalnikaŭ byŭ Anry de Žuvienel, muž Kalet — viadomaj francuzskaj piśmieńnicy, jakaja stvaryła tut niekalki ramanaŭ.
Ź siaredziny XX stahodździa Kastel Navel staŭ vykarystoŭvacca jak hatel z restaranam. U samim zamku naličvajecca 26 pakojaŭ, jašče 10 — u raźmieščanym pobač katedžy. Jość basiejn i tenisny kort. Vakoł znachodzicca park płoščaj 16,5 hiektara.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary
[Zredahavana]