Lider Partyi BNF Alaksiej Janukievič pierakanany, što ŭ Minharsaviet nie trapić nivodzin niezaležny kandydat. Pra heta jon zajaviŭ u interv`iu paśla taho, jak 25 krasavika prahałasavaŭ na ŭčastku №68 pa Haładziedaŭskaj vybarčaj akruzie №6 Minska, dzie ź`iaŭlajecca kandydatam u deputaty.
Što da Minska, to ja na 100% pierakanany, što ŭłady nie dapuściać u Minharsaviet nie toje što kandydataŭ ad apazicyjnych partyj, ale navat i niezaležnych kandydataŭ sa svajoj niezaležnaj pazicyjaj. Tut usio budzie absalutna prakantralavana i «zakatana ŭ bieton». Što da rehijonaŭ, to ŭsie našy kandydaty, jakija vyrašyli iści da kanca, sutykajucca z usio bolš sur`ioznymi pieraškodami. Naprykład, praktyčna niemahčyma atrymać vyniki daterminovaha hałasavańnia. Ale ja dapuskaju, što da piaci čałaviek niejkim cudam mohuć stać deputatami miascovych savietaŭ», — zajaviŭ Janukievič.
U cełym, pavodle jaho słoŭ, ludzi reahujuć na hetyja vybary bolš pazityŭna, asabliva ŭ paraŭnańni z apošnimi parłamienckimi vybarami.
«Padčas abchodu kvater, zboru podpisaŭ adčuvajecca, što ludzi pa-inšamu nastrojeny. Ludzi pazityŭna nastrojeny ŭ dačynieńni da nas, da kandydataŭ ad Partyi BNF, ale rasčaravany samoj praceduraj vybaraŭ. Tamu mienš zacikaŭlenaści ŭ tym, kab iści na vybary. I my ciapier heta bačym: 10-ja hadzina ranicy, i pustata na ŭčastkach — heta śviedčyć ab tym, što niama nijakaha davieru da samoj pracedury vybaraŭ», — adznačyŭ Janukievič.
Na jaho dumku, źmieny, uniesienyja ŭ Vybarčy kodeks, byli niaznačnymi i kaśmietyčnymi, sur`iozna nie źmianili praktyku praviadzieńnia vybaraŭ u Biełarusi. «Razam z tym, kali my vyrašyli iści da kanca, to pavinny iści da kanca. Ja liču, što havaryć vybarščykam ab nieabchodnaści hałasavańnia, ahitavać, danosić svaju pazicyju, a samamu siadzieć ź niapeŭnaj pazicyjaj adnosna vybaraŭ — heta niapravilna. My idziem na vybary bieź iluzij, razumiejučy, što jany niesvabodnyja i niespraviadlivyja, ale my prachodzim hetuju praceduru da kanca», — skazaŭ lider Partyi BNF.
Na jaho dumku, navat siońniašnija miascovyja saviety, jakija majuć vielmi abmiežavanyja paŭnamoctvy, usio roŭna važnyja dla vybarščykaŭ i dla palityčnych partyj, jakija ŭdzielničajuć u vybarach. «Deputat miascovych savietaŭ maje peŭny status i peŭnyja pazicyi. Jon moža abaranić intaresy ludziej, moža vykarystać heta dla taho, kab pavyšać padtrymku partyi siarod nasielnictva», — adznačyŭ Janukievič.
Kamientary