Va ŭkrainski pałon trapili jašče troje hramadzian Biełarusi, jakija vajavali na baku Rasii. Usie jany byli sudzimyja
Va Ukrainie śpis biełaruskich pałonnych pavialičyŭsia jašče na try čałavieki. Ciapier va ŭkrainskim pałonie znachodziacca 13 hramadzian Biełarusi, jakija vajavali na baku Rasii. Jak paviedamili «Radyjo Svaboda» va ŭkrainskim prajekcie «Chaču žyć», jaki viadzie Kaardynacyjny štab Ukrainy pa pytańniach abychodžańnia z vajennapałonnymi, ich usich uziali ŭ pałon u kancy leta — pačatku vosieni na danieckim kirunku.
Imiony novych vajennapałonnych biełarusaŭ:
- Aziambłoŭski Viktar Alaksandravič (naradziŭsia ŭ Minsku 20 lipienia 1977 hoda, trapiŭ u pałon pablizu nasielenaha punkta Liman);
- Karłoŭski Uładzisłaŭ Jaŭhienavič (naradziŭsia ŭ Dziaržynsku 11 vieraśnia 2001 hoda, u pałon uziali ŭ Danieckaj vobłaści);
- Kupracevič Rusłan Rusłanavič (naradziŭsia ŭ pasiołku Krasny Homielskaha rajona 31 kastryčnika 2001 hoda).
Viktar Aziambłoŭski padpisaŭ kantrakt z rasijskaj armijaj 15 traŭnia 2025 hoda. Maje 25‑hadovaha syna, z žonkaj razyšoŭsia.
Zhodna ź infarmacyjaj abjadnańnia byłych siłavikoŭ BelPol, Aziambłoŭski maje vialikuju pracoŭnuju bijahrafiju, ale čaściej za ŭsio jon nidzie nie zatrymlivaŭsia bolš jak na hod. Pačaŭ pracavać u 2003 hodzie, majučy 26 hadoŭ. Pieršaje miesca pracy — upraŭleńnie adukacyi administracyi Partyzanskaha rajona Minska. Paśla pracavaŭ na bolš jak 13 pradpryjemstvach budaŭničaha i kamunalnaha profilu, a taksama na Minskim zavodzie kołavych ciahačoŭ.
Najdaŭžej — 5 hadoŭ — jon pracavaŭ na pradpryjemstvie «Adzinaccać», jakoje padparadkoŭvajecca Departamientu vykanańnia pakarańniaŭ MUS Biełarusi. Jano znachodzicca ŭ Vaŭkavysku Hrodzienskaj vobłaści i vypuskaje vialiki asartymient pradukcyi — meblu, elektratechničnyja tavary, śpiecyjalnaje adzieńnie i pradukty charčavańnia. Mienavita na hetym pradpryjemstvie ŭ 2017 hodzie skončyłasia jahonaja pracoŭnaja bijahrafija, i, pavodle źviestak na 2021 hod, bolš nidzie jon nie pracavaŭ.
Sudzimy za kradziažy, niavypłatu alimientaŭ, uchileńnie ad adbyvańnia pakarańnia i za parušeńnie pravił znachodžańnia ŭ papraŭčych ustanovach.
Uładzisłaŭ Karłoŭski padpisaŭ kantrakt z rasijskaj armijaj u lipieni 2025 hoda.
U 2018 hodzie vučyŭsia ŭ Dziaržynsku ŭ abłasnym ahrarna-techničnym prafiesijnym licei.
Pavodle źviestak BelPol, u 2021 hodzie jon nidzie nie pracavaŭ.
Jaho sudzili za šmat epizodaŭ zbytu psichatropaŭ u składzie arhanizavanaj hrupy.
Rusłan Kupracevič, jak i Karłoŭski, taksama pačaŭ vajavać suprać Ukrainy na baku Rasii sioleta ŭ lipieni.
Jany razam słužyli ŭ 136‑j asobnaj motastrałkovaj bryhadzie Suchaputnych vojskaŭ, jakaja dysłakujecca ŭ Dahiestanie i jakoj kamanduje dahiestaniec.
Rusłan Kupracevič asudžany za kradziažy.
Darečy, heta pieršy viadomy vypadak, kali biełarusaŭ zaličyli ŭ adnu bryhadu.
Stała viadoma jašče pra adnaho biełarusa, jaki vajavaŭ na baku Rasii i trapiŭ u pałon
Kaho bolš pałonnych: ukraincaŭ ci rasijan?
Prajšoŭ druhi etap rasijska-ŭkrainskaha abmienu vajennapałonnymi. Abmianiali i adnaho biełarusa
Zialenski: Rasija admaŭlajecca abmieńvać biełaruskich pałonnych ci palitviaźniaŭ
Ukraina pieradała Rasii jašče adnaho pałonnaha biełarusa
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja4
Kamientary