Kurmanbiek Bakijeŭ źviarnuŭsia sa stalicy Biełarusi da suśvietnaj supolnaści. Miery pieraściarohi vakoł budynka Vykankama SND byli pryniatyja nadzvyčajnyja.
21 krasavika ŭ Vykankamie SND u Minsku eks‑prezident Kyrhyzstana Kurmanbiek Bakijeŭ, jaki zaraz razam ź siamjoj znachodzicca ŭ Biełarusi, źviarnuŭsia da suśvietnaj supolnaści i naroda Kyrhyzstana.
Zvarot doŭžyŭsia roŭna čatyry chviliny, a miery pieraściarohi byli pryniatyja nadzvyčajnyja.
Kvartał pierad budynkam SND — na rahu vulic Kirava i Kamsamolskaja, nasuprać stadyjona «Dynama» — byŭ ačepleny milicyjaj, usie aŭtamabili evakujavanyja, milicyjaniery z sabakami i minašukalnikami šukali vybuchoŭku. Prysutničali milicyjaniery z sabakami i ŭ samim budynku.
Zvarot Bakijeva ŭtrymlivaŭ vosiem punktaŭ.
Eks‑prezident zajaviŭ, što nie pryznaje svajoj adstaŭki.
«Moj narod pieražyvaje strašnuju trahiedyju, -- z hetych słovaŭ Kurmanbiek Bakijeŭ pačaŭ svoj zvarot da suśvietnaj supolnaści. — Banda samaŭładcaŭ abjaviła siabie ŭładaj. Hvałt stanovicca normaj žyćcia. Kraina adkinutaja na dziesiatki hadoŭ nazad»,-- takim čynam acharakteryzavaŭ K.Bakijeŭ toje, što zaraz adbyvajecca ŭ Kyrhyzstanie. Jon taksama pryznaŭ, što jak prezident Kyrhyzstana nie moža źniać ź siabie adkaznaści za heta i hatovy adkazvać pierad zakonam, ale taksama nie maje namieru zdavacca «bandzie bandytaŭ».
Zatym Kurmanbiek Bakijeŭ źviarnuŭsia da suśvietnaj supolnaści, kiraŭnikoŭ krain SND i narodu Kyrhyzstana. Zvarot składaŭsia z vaśmi punktaŭ.
U pieršym K.Bakijeŭ vykazaŭ spačuvańni siemjam i blizkim zahinułych padčas źmieny ŭłady ŭ Kyrhyzstanie . U druhim paviedamiŭ, što nie pryznaje svajoj adstaŭki i paabiacaŭ praź niekatory čas patłumačyć heta.
«10 miesiacaŭ tamu narod Kyrhyzstana abraŭ mianie prezidentam. Zaraz tolki śmierć spynić mianie. Ja zakonny prezident, pryznany suśvietnaj supolnaściu», -- zajaviŭ jon.
U trecim punkcie svajoj zajavy K. Bakijeŭ nazvaŭ siońniašnija ŭłady Kyrhyzstana nielehitymnymi i vykazaŭ upeŭnienaść, što źmiena ŭłady ŭ Biškieku arhanizavanaja zvonku. «Kyrhyzstan nie stanie kałonijaj. Moj narod žadaje być svabodnym i stanie svabodnym. Jon praciahnie pabudovu sučasnaj niezaležnaj dziaržavy», -- zajaviŭ K.Bakijeŭ.
Zatym były kiraŭnik Kyrhyzstana nahadaŭ ab ŭviedzienym 7 krasavika nadzvyčajnaha stanovišča ŭ krainie i paabiacaŭ, što ŭsie, chto parušyŭ jaho buduć pakaranyja.
«Ja zaklikaju suśvietnuju supolnaść nie pryznavać bandy lehitymnaj uładaj. Nie stvarajcie precedenta. Ja nastojvaju na praviadzieńni niezaležnaha mižnarodnaha razśledvańnia i pakarańni vinavatych u hibieli ludziej», -- zajaviŭ Kurmanbiek Bakijeŭ.
Źviarnuŭsia jon taksama i da kiraŭnikoŭ krain SND: «Našaj svabodzie i niezaležnaści bolš za dva dziesiatki hadoŭ, nie adstupajcie pierad hrubaj siłaj, vy adkazvajecie za svoj narod».
Na zaviaršeńnie svajoj zajavy Kurmanbiek Bakijeŭ źviarnuŭsia da narodu Kyrhyzstana. «U nas jość siabry i ich šmat. My nie adny. My možam abapiercisia na ich u ciažkuju chvilinu i uratavać krainu ad vialikaj biady».
Skončyŭ svaju zajavu K.Bakijeŭ abiacańniami zrabić usio, kab viarnuć Kyrhyzstan u kanstytucyjny ład. «Ja pierakanany ŭ žadańni majho naroda pieraadoleć smutu», – zajaviŭ Kurmanbiek Bakijeŭ.
* * *
Pra toje, što Bakijeŭ razam ź siamjoj znachodzicca ŭ Minsku stała viadoma ŭ aŭtorak padčas vystupu A. Łukašenki ŭ biełaruskim parłamiencie. Kiraŭnik Biełarusi zajaviŭ, što Bakijeŭ prylacieŭ u Minsk u paniadziełak na jaho zaprašeńnie.
Kamientary