Prezident ZŠA ŭ apošni momant pierad zakančeńniem terminu handlovaha pieramirja z Kitajem adkłaŭ uviadzieńnie vialikich pošlin na kitajski impart jašče na 90 dzion. Toje ž samaje sinchronna zrabiŭ i Kitaj u dačynieńni da impartu z ZŠA, piša Bi-bi-si.
Pra toje, što Tramp padpisaŭ ukaz ab novaj adterminoŭcy, spačatku ŭ paniadziełak paviedamiła amierykanskaja presa, spasłaŭšysia na ananimnych supracoŭnikaŭ Biełaha doma, i tolki praź niekalki hadzin hetuju infarmacyju paćvierdziŭ sam prezident ZŠA.
«Ja tolki što padpisaŭ ukaz, jaki padaŭžaje adterminoŭku pošlin u dačynieńni da Kitaja jašče na 90 dzion», — paviedamiŭ Tramp u svajoj sacsietcy Truth Social.
Pryblizna ŭ toj ža čas z Trampam zajavu ab takim ža kroku z svajho boku zrabiŭ i Kitaj u asobie Ministerstva handlu.
Ministerstva zajaviła, što Kitaj pakidaje pošliny na impart z ZŠA na ŭzroŭni 10%, a taksama pradprymie peŭnyja kroki ŭ dačynieńni da nietaryfnych barjeraŭ u adnosinach da amierykanskich tavaraŭ. Amierykanskija pošliny na kitajski impart zastajucca na ŭzroŭni 30%.
«Taryfnaje pieramirje» pamiž Kitajem i ZŠA, ab jakim baki damovilisia ŭ mai, zakančvałasia ŭ aŭtorak apoŭdni pa vašynhtonskim časie. Kali b baki jaho nie pradoŭžyli, ZŠA tearetyčna pačali b uzdymać pošliny na kitajski impart da 145%, a Kitaj na amierykanski — da 125%.
«Padaŭžeńnie da pačatku listapada daje čas dla siezonnaha vosieńskaha ŭsplosku impartnych pastavak da kaladnaha siezonu — elektroniki, adzieńnia, cacak — pa bolš nizkich taryfnych staŭkach», — adznačaje ahienctva Reuters.
Hetaja adterminoŭka, chacia pra jaje i abviaścili aficyjna ŭ apošni momant, była całkam čakanaj. Paśla taho jak u mai baki damovilisia ab 90-dzionnaj paŭzie, jany praciahvali pieramovy, i z apošniaj sustrečy ŭ Stakholmie ŭ kancy lipienia amierykanskaja delehacyja pryviezła Trampu ŭ Vašynhton rekamiendacyju pradoŭžyć pieramirje, pakolki pieramovy iduć paśpiachova.
Ministr finansaŭ ZŠA Skot Biesent nieadnarazova havaryŭ, što trochznačnyja staŭki pošlin, jakija Tramp i Piekin abviaścili ŭ krasaviku padčas abmienu adkazami na chady adzin adnaho, nieracyjanalnyja i pa sutnaści aznačajuć handlovaje embarha pamiž dvuma najbujniejšymi handlovymi partniorami ŭ śviecie.
Byłaja kiraŭnica Biuro mižnarodnych ekanamičnych adnosin u administracyi Trampa ŭ jaho pieršy termin Keli En Šou skazała ahienctvu Reuters, što Tramp, chutčej za ŭsio, damohsia ad Kitaja niejkich novych sastupak pierad tym, jak pahadzicca na padaŭžeńnie pieramirja.
«Heta było b nie ŭ styli Trampa, kali b jon zrabiŭ heta nie ŭ samy apošni momant», — skazała Šou.
Donald Tramp u niadzielu zapatrabavaŭ ad Kitaja ŭ čatyry razy pavialičyć zakupki amierykanskaj soi. A ŭ paniadziełak jon zajaviŭ, što ZŠA «vielmi dobra ładziać z Kitajem», a ŭ jaho samoha — vielmi dobryja adnosiny z staršynioj KNR Si Czińpinam — i soju ŭžo nie zhadaŭ.
Tramp i Piekin adkłali ŭviadzieńnie najvyšejšych, pa sutnaści zaharadžalnych pošlin, ale pavyšanyja staŭki zastalisia ŭ sile i, jak adznačaje Reuters, jany ŭžo niekalki skaracili deficyt u handli ZŠA z Kitajem.
Pa danych Ministerstva handlu ZŠA, apublikavanych na minułym tydni, u červieni deficyt rezka, na tracinu, źniziŭsia — u asnoŭnym za košt rostu amierykanskaha ekspartu ŭ Kitaj — i skaraciŭsia da ŭzroŭniu 21-hadovaj daŭnaści, da 9,4 młrd dalaraŭ.
Usiaho ž za pieršyja piać miesiacaŭ hoda roźnica pamiž kitajskim impartam u ZŠA i amierykanskim — u Kitaj skaraciłasia bolš čym na 22 młrd dalaraŭ u paraŭnańni sa studzieniem-červieniem minułaha hoda. Za ŭvieś minuły hod heta roźnica skłała amal 300 młrd dalaraŭ.
«Tramp śćviardžaje, što pošliny skaračajuć deficyt źniešniehandlovaha bałansu ZŠA. Ale Amieryka kuplaje bolš, čym pradaje, tamu što choča i moža, a zaroblenyja na eksparcie ŭ ZŠA dołary bolšaść krain, nakštałt Kitaja i Japonii, układvajuć u amierykanskija aktyvy, što dazvalaje Amierycy žyć nie pa srodkach voś užo amal paŭstahodździa», — nahadaŭ u lipieni ekanamičny ahladalnik Bi-bi-si Alaksiej Kałmykoŭ, raźbirajučy, što pajšło nie tak u handlovaj vajnie Trampa z usim śvietam.
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary