Tramp zajaviŭ, što Izrail pahadziŭsia na ŭmovy 60-dzionnaha pieramirja ŭ Hazie

Prezident ZŠA Donald Tramp zajaviŭ, što izrailski bok na sustrečy z pradstaŭnikami Vašynhtona pahadziŭsia na ŭmovy, nieabchodnyja dla spynieńnia ahniu ŭ siektary Haza na dva miesiacy, piša Bi-bi-si. 

«Siońnia maje pradstaŭniki praviali doŭhuju i praduktyŭnuju sustreču ź izrailcianami pa pytańni Hazy. Izrail pahadziŭsia na nieabchodnyja ŭmovy dla zaklučeńnia 60-dzionnaha pieramirja, na praciahu jakoha my budziem pracavać z usimi bakami, kab pakłaści kaniec vajnie», — napisaŭ jon u svajoj sacsietcy Truth Social, nie ŭdakładniajučy, što heta za ŭmovy.

Sa słoŭ amierykanskaha lidara, pradstaŭniki Katara i Jehipta, jakija «vielmi staranna pracavali nad ustalavańniem miru», pieradaduć bajevikam hrupoŭki CHAMAS kančatkovuju prapanovu.

«Ja spadziajusia, što dziela dabra Blizkaha Uschodu CHAMAS prymie hetaje pahadnieńnie, tamu što lepš nie stanie — budzie tolki horš», — dadaŭ Tramp. Pradstaŭniki CHAMAS heta pakul nie kamientavali. Amierykanskija ŚMI raniej paviedamlali, što ŭ Vašynhton prybyŭ ministr stratehičnaha płanavańnia Izraila Ron Dermier, jaki pavinien byŭ abmierkavać z pradstaŭnikami biełaha doma situacyju ŭ siektary Haza i Iranie, a taksama vizit Izrailskaha premjer-ministra Bińjamina Nietańjachu ŭ ZŠA.

U aŭtorak Tramp zajaviŭ, što, na jahonuju dumku, Nietańjachu choča pakłaści kaniec vajskovym dziejańniam u Hazie.

«Jon choča hetaha. Ja mahu vam skazać, što jon choča hetaha. Dumaju, na nastupnym tydni my dasiahniem pahadnieńnia», — skazaŭ prezident ZŠA. Pieršapačatkovaje abviaščeńnie ab spynieńni ahniu pamiž Izrailem i CHAMAS, jakoje ŭstupiła ŭ siłu 19 studzienia, praduhledžvała try etapy, ale nie prasunułasia dalej pieršaha.

Druhi etap uklučaŭ ustalavańnie pastajannaha spynieńnia ahniu, viartańnie pakinutych u žyvych zakładnikaŭ u Hazie ŭ abmien na palestyncaŭ, jakija znachodziacca ŭ izrailskich turmach, i poŭny vyvad Izrailskich vojskaŭ z Hazy.

U sakaviku izrailskija vojski adnavili masiravanyja ŭdary pa siektary Haza. U kancylaryi Nietańjachu zajavili, što heta adbyłosia paśla admovy CHAMAS vyzvalić zakładnikaŭ i pryniać prapanovy ZŠA i pasiarednikaŭ.

U kancy traŭnia CHAMAS apublikavaŭ adkaz na prapanovu ab pieramirji na 60 dzion, adnak sustrečnyja ŭmovy hrupoŭki ŭ ZŠA i Izraili adchilili.

Jak adznačaje vydańnie Times of Israel, pieramovy pamiž bakami zajšli ŭ tupik u asnoŭnym praz umovy, jakija buduć dziejničać paśla zakančeńnia pieramirja: Izrail patrabuje zachavać za saboj prava adnavić bajavyja dziejańni, a CHAMAS imkniecca zrabić časovaje pieramirje stałym.

Arabskija pasiaredniki sprabujuć znoŭ sabrać pieramoŭnikaŭ ad Izraila i CHAMAS dla praviadzieńnia niepramych pieramovaŭ u Kairy, kab likvidavać roznahałośsi, jakija zastajucca, piša vydańnie.

• 0
• 0
• 0
• 0
• 0
• 0
• 0
• 0