«Byvaje, što stračvaje prytomnaść». U palitźniavolenaj Valeryi Kaściuhovaj paharšajecca stan zdaroŭja
Čatyry hady tamu KDB zatrymała viadomuju žurnalistku, palitołaha Valeryju Kaściuhovu. Užo amal 3 hady Valeryju Kaściuhovu ŭtrymlivajuć u žanočaj kałonii №4 u Homieli. Krynica, daśviedčanaja ŭ spravach Valeryi Kaściuhovaj, paviedamlaje najpierš pra paharšeńnie jaje stanu zdaroŭja, piša «Radyjo Svaboda».
«Zdaroŭje ŭ jaje drennaje i jano pastajanna paharšajecca. U jaje hipateryjoz [panižany ŭzrovień harmonaŭ ščytapadobnaj załozy], ale prablema ŭ tym, što tudy nie puskajuć dobryja leki, tolki biełaruskija anałahi. Tamu heta prykmietna adbivajecca na jaje stanie: słabaść, chutka stamlajecca, parušanaja termarehulacyja, z-za čaho byvaje, što stračvaje prytomnaść — na soncy abo asabliva padčas fizičnaj pracy», — raskazała krynica.
Pavodle krynicy, niezadoŭha da źniavoleńnia ŭ Valeryi Kaściuhovaj uźnikli prablemy z nadnyračnikami, i ciapier joj patrebny pastajanny nahlad daktaroŭ.
«Joj uvieś čas patrebny asablivy dohlad, dyjeta, a heta ŭsio taksama nie ŭličvajecca. Ablehčanaha režymu pracy joj nie dajuć. Taksama na paharšeńnie zdaroŭja ŭpłyvaje jakaść ježy, niedachop snu i adpačynku. Plus psichałahičny stan», — patłumačyła krynica.
Pry hetym, pavodle krynicy, peŭnuju miedycynskuju dapamohu Valeryja Kaściuhova ŭ miedycynskaj častcy kałonii atrymlivaje. Tak, niadaŭna jana naviedała stamatołaha i zastałasia zadavolenaja dapamohaj.
«Jana praciahvaje pracavać švačkaj. Viadoma, stamlajecca, bo praca ciažkaja, a sił u jaje niašmat, ale nie skardzicca, trymajecca», — raskazała krynica.
Valeryja Kaściuhova była zatrymanaja 30 červienia 2021 hoda ŭ svajoj kvatery. Paśla praciahłaha vobšuku, jaki pravodzili supracoŭniki KDB, jaje źmiaścili ŭ izalatar časovaha ŭtrymańnia na Akreścina, adkul pieraviali na «Vaładarku». Tolki praz paŭtara hoda pačaŭsia sudovy praces, na jakim Valeryju Kaściuhovu pryznali vinavataj pavodle troch artykułaŭ Kryminalnaha kodeksu: č. 1 art. 357 («dapamoha dziejańniam, učynienym z metaj zachopu ŭłady»), č. 3 art. 361 («zakliki da dziejańniaŭ, nakiravanych na pryčynieńnie škody nacyjanalnaj biaśpiecy») i č. 3 art. 130 («raspalvańnie inšaj sacyjalnaj varožaści»).
17 sakavika 2023 hoda Valeryju Kaściuhovu i jaje kalehu pa ekśpiertnaj supolnaści Taćcianu Kuzinu asudzili kožnuju na dziesiać hadoŭ pazbaŭleńnia voli ŭ kałonii va ŭmovach ahulnaha režymu.
Valeryi Kaściuhovaj 57 hadoŭ, jana viadomy ŭ Biełarusi palitołah, zasnavalnica i redaktarka sajta ekśpiertnaj supolnaści «Našie mnienije», redaktarka i aŭtarka «Biełaruskaha štohodnika» i kiraŭnica hrupy ekśpiertaŭ manitorynhu «Biełaruś u fokusie».
Kamientary