Na mitynhu ŭ Varšavie Łatuška publična paspračaŭsia z Paźniakom pra sankcyi

Kiroŭny režym u Biełarusi hatovy iści na pieramovy z Zachadam, a Jeŭrasajuz ź Minskam — nie, zajaviŭ kiraŭnik ruchu «Volnaja Biełaruś» Zianon Paźniak na mitynhu ŭ Varšavie 18 traŭnia z nahody Mižnarodnaha dnia salidarnaści ź biełaruskimi palitviaźniami, piša «Pozirk». 

Pavodle palityka, viadomaha svajoj antysankcyjnaj pazicyjaj, dziejańni ES nakiravany na izalacyju krainy:

«Biełaruś hetymi sankcyjami ŭšturchnuta ŭ Rasiju. Vy nie źniščycie režym sankcyjami — nikoli ŭ historyi takoha nie było. Tym bolš kali adkryta rasijskaja miaža. Ekanomika pajšła tudy, handal pajšoŭ tudy, ludzi pajšli tudy — i rasiejcy pryjšli siudy. Voś vynik — heta vyhadna tolki Pucinu».

Paźniak śćviardžaje, što jon «časta źviartajecca ŭ Jeŭraźviaz»: «Pisali listy [staršyni Jeŭrakamisii Ursule] fon der Lajen — usio pajšło tudy, usio jany viedajuć. Nijakaha adkazu. Adpiski. Tamu što palityka, jakuju ŭznačalvajuć niemcy, idzie na toje, kab izalavać Biełaruś. Nas užo vyšturchnuli <…> — robiać «žaleznuju zasłonu».

«Vypuścili bolš za 200 viaźniaŭ. Pakazvajuć znakam Jeŭropie: «Davajcie vieści dyjałoh». Inačaj nie možna vyzvalić zakładnikaŭ. Z terarystami treba ŭstupać u pieramovy, u handal, kab vyzvalić ludziej ad śmierci. Heta elemientarnyja rečy», — ličyć Paźniak.

Z prychodam da ŭłady ŭ ZŠA Donalda Trampa «śviet mianiajecca», skazaŭ jon, dadaŭšy, što biełarusam treba «tolki da amierykanskaj demakratyi zaraz źviartacca», spadziejučysia na dapamohu.

«Jość mahčymaść vymieniać usich palitviaźniaŭ na źniaćcie sankcyj. Jany nie patrebny biełaruskamu narodu», — zajaviŭ kiraŭnik «Volnaj Biełarusi».

Namieśnik kiraŭnika Abjadnanaha pierachodnaha kabinieta, kiraŭnik Narodnaha antykryzisnaha ŭpraŭleńnia Pavieł Łatuška zajaviŭ, što zhodny «ź Zianonam Stanisłavavičam u tym, što zaraz staić vyklik <…> dla našaj nacyi», i ŭ tym, što treba «cisnuć bolš na partnioraŭ, bo jany zabylisia pra Biełaruś».

Adnačasova jon zajaviŭ:

«Treba cisnuć i stavić ultymatum Łukašenku. Tut pavinna być łohika, paśladoŭnaść i moc. Ja nie razumieju tych palitykaŭ, jakija kažuć, što sankcyi treba źnieści, ale adnačasova kažuć, što Ukraina pavinna pieramahčy. Prabačcie, jak pieramoža Ukraina, kali praź Biełaruś budzie vieličeznaja dzirka pa pastaŭcy technałohij — usiaho taho, što patrebna, kab rabić zbroju, kab zabivać našych bratoŭ i siaścior?»

Pavodle słoŭ kiraŭnika NAU, jon taksama nie razumieje «łohiki, kali chtości kaža, što sankcyi — heta drenna», ale kali pry hetym u pytańni vyzvaleńnia palitviaźniaŭ «jość tolki adzin arhumient, jakim treba skarystacca, — heta sankcyi».

«Tak voś mienavita dziela hetaha my i pracavali na sankcyi, šanoŭnyja, kab siońnia skazać, što voś jość mocnyja sankcyi, nie chapaje — davajcie dadamo. I vyzvalaj nie 42 asoby, jak minuły raz, a vyzvalaj tysiaču, vyzvalaj usich palitźniavolenych. Bo [Łukašenka] vyzvalaje [palitviaźniaŭ] tolki tamu, što choča źnieści sankcyi. I mienavita heta jon prapanavaŭ amierykancam», — dadaŭ Łatuška.

Łatuška taksama vykazaŭsia za ŭviadzieńnie ES handlovaha embarha ź Minskam.

Pavodle pravaabarončaha centra «Viasna», na 18 traŭnia ŭ Biełarusi palityčnymi źniavolenymi pryznany 1173 čałavieki.

• 23
• 1
• 5
• 9
• 1
• 1
• 0
• 0