Vysadka ŭ Hrenłandyi: Džej Dzi Vens razam z žonkaj prylacieŭ na vostraŭ biez zaprašeńnia
Vizit vice-prezidenta ZŠA Džeja Dzi Vensa i jaho žonki Ušy ŭ Hrenłandyju vyklikaŭ burnuju krytyku jak na samim vostravie, tak i ŭ Danii.
Samalot ź siamiejnaj paraj pryziamliŭsia na amierykanskaj vajskovaj bazie «Pitufik» na paŭnočnym zachadzie Hrenłandyi — daloka ad stalicy Nuuk, dzie vizit paličyli niepažadanym. Urad Hrenłandyi zahadzia padkreśliŭ, što «nie zaprašaŭ nikoha — ni ŭ pryvatnym, ni ŭ aficyjnym paradku», piša Bild.
Hrenłandcy vostra adreahavali na čarhovy vizit, asabliva paśla žartu Vensa, jaki jon apublikavaŭ pierad vyletam: «Raz usie tak raschvalavalisia z-za pajezdki Ušy, ja padumaŭ — niachaj i mnie budzie trochi viesialej, palaču ź joj».
Na fonie raniejšych zajaŭ Donalda Trampa pra namier «anieksavać abo vykupić» vostraŭ, padobnyja słovy tolki ŭzmacnili napružańnie.
«My nie možam pryniać paŭtaralnyja zajavy pra dałučeńnie i kantrol nad Hrenłandyjaj», — adkazaŭ premjer-ministr vostrava Mute Ehiede.
Vens zajaviŭ, što prybyŭ, kab pravieryć «biaśpieku na bazie» i nahadaŭ, što «mnohija krainy pahražajuć Hrenłandyi, jaje terytoryi i marskim šlacham».
Adnak ułady vostrava ŭpeŭnienyja, što sprava zusim nie ŭ biaśpiecy. Premjer-ministr Danii Miete Frederyksien prama zajaviła, što dziejańni ZŠA — heta «nieprymalny cisk» i što «havorka dakładna nie idzie pra patreby i žadańni Hrenłandyi».
Pad naciskam krytyki amierykanskaja delehacyja skaročvaje čas znachodžańnia na vostravie da adnaho dnia. Uša Vens taksama admianiła ŭdzieł u spabornictvach pa jaździe na sabačych uprežkach.
Kamientary