Sud u ZŠA ŭvioŭ časovuju zabaronu na spynieńnie finansavańnia Radyjo Svaboda
Fiederalny akruhovy sud u Vašynhtonie ŭ aŭtorak zadavoliŭ chadajnictva miedyjachołdynhu «Radyjo Svabodnaja Jeŭropa / Radyjo Svaboda» (RSIE/RS) ab časovaj zabieśpiačalnaj miery, što ŭtrymlivałasia ŭ pazovie, padadzienym hetaj arhanizacyjaj suprać Ahienctva ZŠA pa hłabalnych miedyja (USAGM), paviedamlaje Rasijskaja słužba karparacyi.
Sud pastanaviŭ, što da razhladu spravy pa sutnaści, jaki, jak čakajecca, adbudziecca ŭ najbližejšyja tydni, ahienctva pavinna ŭstrymacca ad dziejańniaŭ, jakija mohuć pryvieści da zakryćcia Radyjo Svabodnaja Jeŭropa / Radyjo Svaboda,
Siarod takich dziejańniaŭ — rašeńnie, abvieščanaje 15 sakavika staršaj daradcaj kiraŭnika USAGM Kery Łejk, pra skasavańnie hrantavaha pahadnieńnia, zhodna ź jakim RSIE/RS atrymlivaje praz USAGM finansavańnie, vydzielenaje Kanhresam ZŠA.
Sudździa Rojs Łambiert u rašeńni na dziesiaci staronkach adznačyŭ, što vykanańnie hetaha rašeńnia naniesła b RSIE/RS «niepapraŭnuju škodu».
«Kiraŭnictva USAGM nie moža, praktyčna biez tłumačeńnia, adnoj frazaj prymusić RSIE/RS spynić pracu — navat kali heta było b rasparadžeńniem prezidenta», — padkreśliŭ sudździa.
Nastupnym etapam stanie razhlad chadajnictva RSIE/RS, kab dać miedyjakarparacyi kala 77 miljonaŭ dalaraŭ, vydzielenych raniej Kanhresam ZŠA na jaje pracu na hety finansavy hod — da kanca vieraśnia 2025 hoda. Paviedamleńnie Kery Łejk ab spynieńni finansavańnia faktyčna mieła metaj pieraškodzić pieradačy hetych srodkaŭ RSIE/RS.
«My cenim pradumanaje i adnaznačnaje rašeńnie sudździ Łambierta, jakoje nie dazvalaje USAGM ihnaravać volu Kanhresa. My čakajem dalejšaha razhladu našaj pazicyi nakont niekanstytucyjnaści admovy ŭ finansavańni, što było vydzielena na astatniuju častku finansavaha hoda», — zajaviŭ prezident i hienieralny dyrektar RSIE/RS Styvien Kapus.
Napiaredadni Ahienctva ZŠA pa hłabalnych miedyja pahadziłasia pieradać Radyjo Svaboda častku srodkaŭ, vydzielenych Kanhresam. Heta stała viadoma 24 sakavika — napiaredadni pryznačanaha sudovaha pasiadžeńnia. Heta aznačaje, što ŭ najbližejšy čas RSIE/RS pavinna atrymać 7,46 miljona dalaraŭ — sumu, jakaja pakryvaje vydatki za pieryjad z 1 pa 14 sakavika.
Kamientary