Rasija na pieramovach u Saudaŭskaj Aravii patrabuje ŭsiu terytoryju čatyroch ukrainskich abłaściej

Choć nivodzin z hetych rehijonaŭ rasijskaja armija nie kantraluje całkam, Kreml raźličvaje atrymać ich u administracyjnych miežach — u adpaviednaści z Kanstytucyjaj Rasii, dzie zamacavanaja ich anieksija.

Uładzimir Pucin palityčna nie moža sabie dazvolić stracić hetyja terytoryi, i Rasija maje namier luboj canoj zamacavać nad imi kantrol, skazaŭ The Moscow Times čynoŭnik, blizki da Kramla.

«U Kanstytucyi niama miechanizmu dla vychadu rehijonaŭ sa składu Rasii. Nam patrebnyja ŭsia Zaparožskaja i ŭsia Chiersonskaja vobłaści», — skazaŭ jon.

Sa słoŭ inšaj krynicy, dziejnaha rasijskaha čynoŭnika, Kreml spadziajecca, što Vašynhton, mahčyma, navat akaža cisk na Kijeŭ z patrabavańniem całkam vyvieści vojski z anieksavanych Rasijaj rehijonaŭ.

«Albo Tramp paŭpłyvaje na ich, kab jany pajšli, albo nam skažuć: «Ustupajcie ŭ zaciažnyja pieramovy i paralelna vykarystoŭvajcie vajskovuju siłu dla ŭstanaŭleńnia kantrolu». Heta horšy dla nas varyjant, tamu što farsiravańnie rek — zaŭsiody balučaja apieracyja», — rastłumačyŭ čynoŭnik.

U jakaści alternatyvy Rasija moža pasprabavać zachapić častku inšaj ukrainskaj vobłaści, naprykład, Dnieprapiatroŭskaj abo Sumskaj, a zatym prapanavać abmien na Chierson i Zaparožža, praciahnuŭ surazmoŭca:

«My spadziajemsia znajści varyjant, pry jakim nie pryjdziecca farsiravać Dniapro i šturmavać Chierson. Vielmi spadziajusia, što da hetaha nie dojdzie. Heta budzie aznačać dla nas tysiačy strat».

Pavodle stanu na luty rasijskaja armija trymała pad kantrolem 98,6% Łuhanskaj vobłaści, 62,6 — Danieckaj, 71,9% — Zaparožskaj i 69,3% — Chiersonskaj. Pryčym u dvuch apošnich rehijonach vajskoŭcy nie kantralujuć ich centry — Zaparožža i Chierson.

«Zaniać hetyja vobłaści vajennym šlacham Rasija chutka nie zdolnaja, kaža izrailski vajskovy ekśpiert David Šarp. Dla rasijan zachop navat pary siołaŭ — užo vialikaje dasiahnieńnie, — kanstatuje jon. — Kab farsiravać Dniapro i ŭziać Chierson, ci navat prosta zaniać horad Zaparožža, jaki raźmieščany na abodvuch bierahach, pavinna adbycca niešta ekstraardynarnaje. Heta vielmi ciažkaja zadača. Albo rasijskaja armija pavinna być kardynalna ŭzmocnienaja, što nie adbudziecca raptoŭna abo źniadkul, albo abarona Ukrainy pavinna całkam abvalicca».

Ale ŭ Maskvie raźličvajuć na toje, što administracyi Donalda Trampa nie hetak važna, jakija mienavita terytoryi adyduć Kramlu, paviedamili The Moscow Times dva rasijskija dypłamaty.

«Nakolki ja razumieju, Tramp choča bačyć sučasnuju, dobra ŭzbrojenuju, prazachodniuju Ukrainu, — skazaŭ adzin ź ich. — Jon (Tramp) nie moža prosta tak addać Ukrainu całkam. Ale dzie mienavita budzie praviedzienaja miaža — dla jaho heta nie tak užo važna».

• 2
• 0
• 5
• 6
• 0
• 0
• 33
• 0