«Załatyja» pašparty astraŭnoj dziaržavy ŭ Cichim akijanie Vanuatu atrymali jak minimum troje viadomych biełarusaŭ: «kašalok» Łukašenki, tytuniovy mahnat Alaksiej Aleksin i jahony małodšy syn Vital Aleksin razam z novaśpiečanaj žonkaj — Nadziejaj Aleksinaj, u dziavoctvie Zajcavaj, piša «Biuro».
U rasparadžeńni «Biuro» majucca danyja zamiežnych hramadzian, jakija atrymali dakumienty Vanuatu. Infarmacyju padali kalehi biełaruskich rasśledavalnikaŭ z vydańnia Intelligence Online. Z uciečki vynikaje, što Aleksiny zajmieli «załatyja» pašparty jašče ŭ 2022 hodzie.
Respublika Vanuatu raźmiaščajecca na 83 astravach u Cichim akijanie i viadomaja svaimi dastupnym hramadzianstvam i afšornymi pasłuhami. Archipiełah śpiecyjalizujecca na prodažy tak zvanych «załatych» pašpartoŭ. Cana pytańnia — 130 tysiač dołaraŭ ZŠA. Vydajecca jon u rekordna karotkija terminy — ad 1 da 4 miesiacaŭ — i dazvalaje rabić biaźvizavyja pajezdki ŭ 130 krain śvietu, u tym liku i ŭ krainy Jeŭrapiejskaha sajuza.
Adnak usimi bonusami «załatych» pašpartoŭ Aleksiny, padobna, skarystacca tak i nie zdolejuć. Reč u tym, što jakraz u 2022 hodzie Rada Jeŭropy prypyniła biaźvizavy režym dla «hramadzian Vanuatu» praz hetuju sumnieŭnuju i lohkadastupnuju schiemu nabyćcia pašparta. U śniežni 2024 hoda ES kančatkova admianiŭ biaźvizavy režym z Vanuatu.
Žurnalist «Biuro» patelefanavaŭ Alaksieju Aleksinu, kab daviedacca, navošta jamu i jahonym svajakam spatrebilisia pašparty Vanuatu, ale «kašalok» Łukašenki skazaŭ, što nie čuje pytańnia, i słuchaŭku bolš nie zdymaŭ.
Jaho syn Vital prakamientavaŭ «Biuro», što nie viedaje, što takoje pašpart Vanuatu: «U mianie tolki biełaruski pašpart, sinieńki», — zajaviŭ Vital Aleksin žurnalistu i abarvaŭ dyjałoh.
Niadaŭna «Biuro» raskazała pra piać novych hanarovych konsulstvaŭ, jakija adkrylisia ŭ Biełarusi. Siarod ich i Respublika Vanuatu, jakuju pradstaŭlaje biznesoviec Alaksandr Kałdžyjeŭ. Sajt jaho konsulstva źjaviŭsia ŭ listapadzie 2023 hoda.
Ciapier čytajuć
«Ja dumaŭ, mianie nie moža ničoha ździvić». Na fudkorcie ŭ minskim HC zrabili płatnyja stały4
Kamientary