ZŠA rychtujuć ździełku z Łukašenkam: vyzvaleńnie palitviaźniaŭ u abmien na sankcyi na kalij i banki
Namieśnik pamočnika dziaržsakratara ZŠA pa Jeŭropie Krys Śmit sustrakaŭsia ŭ Minsku z Alaksandram Łukašenkam i kiraŭnikom KDB Ivanam Ciercielem i abmiarkoŭvaŭ umovy ździełki, piša The New York Times.
Vyzvaleńnie Alaksandram Łukašenkam na hetym tydni hramadzianina ZŠA i dvuch biełaruskich palitviaźniaŭ moža stać pieršym krokam da maštabnaj uhody pamiž Vašynhtonam i Minskam. Pra heta raspavioŭ namieśnik pamočnika dziaržsakratara ZŠA ŭ Jeŭropie Krys Śmit na sustrečy dypłamataŭ u Vilni, paviedamlaje The New York Times.
Takim čynam Vašynhton sprabuje damahčysia ŭ tym liku źnižeńnia ŭpłyvu Maskvy na Minsk, patłumačyŭ amierykanski dypłamat.
Padčas vizitu jon sustreŭsia z Alaksandram Łukašenkam i kiraŭnikom biełaruskaha KDB Ivanam Ciercielem.
U ramkach ździełki, jak raspavioŭ Śmit u Vilni, Łukašenka moža vyzvalić mnostva palitviaźniaŭ, u tym liku šyroka viadomych. Uzamien ZŠA asłabiać sankcyi suprać biełaruskich bankaŭ i ekspartu kalijnych uhnajeńniaŭ.
Hałoŭnaj metaj ZŠA Śmit nazvaŭ vyzvaleńnie bolšaj kolkaści palitviaźniaŭ. Jašče adna važnaja meta — dać Łukašenku «pieradyšku pa-za arbitaj Rasii», kažuć surazmoŭcy žurnalistaŭ.
Śmit skazaŭ, što pytaŭsia ŭ Łukašenki, ci hatovy toj zharnuć represii, i Łukašenka adkazaŭ stanoŭča.
Śmit kuryravaŭ palityku ZŠA pa Biełarusi i pry minułaj amierykanskaj administracyi. Pieramovy z sajuźnikami ZŠA ab źmiakčeńni sankcyj jon pačaŭ jašče letaś.
Na bryfinhu dla zachodnich dypłamataŭ u Vilni Śmit taksama skazaŭ, što ŭ Łukašenki pry sustrečy nie było nijakich prykmiet paharšeńnia zdaroŭja. Jon zdavaŭsia ŭpeŭnienym i całkam kantralujučym situacyju, pieradali krynicy haziety słovy dypłamata.
Sam Śmit publična nie kazaŭ, z kim sustrakaŭsia i što abmiarkoŭvaŭ. Dziarždepartament ZŠA nie adkazaŭ na zapyty haziety.
Ciapier čytajuć
U Minsku pradajuć dom na vadzie. Kolki prosiać za niezvyčajny abjekt na Čyžoŭskim vadaschoviščy?3
Kamientary