Kamieraj, pastaŭlenaj u adnym z polskich lasoŭ, zafiksavanyja dva čornyja vaŭki. Zapis, zrobleny arhanizacyjaj achovy pryrody, daje mahčymaść hłybiej vyvučyć hienietyku hetych zahadkavych drapiežnikaŭ, piša Onet.pl.
Niečakanyja kadry byli źniatyja ŭ minułym hodzie fotapastkaj, jakuju pastaviła Jaana Tačydłoŭskaja, kaardynatarka prajekta SAVE Wildlife Conservation Fund Poland. Hety fakt padšturchnuŭ daśledčykaŭ da zboru probaŭ ź lesu dla analizu hienietyki čornych vaŭkoŭ.
Spačatku Tačydłoŭskaja pastaviła kamieru dla nazirańnia za babrami, ale pabačyŭšy, što jana fiksuje vaŭkoŭ, vyrašyła pakinuć jaje na miescy. Praź niekatory čas joj udałosia atrymać videa z čornym vaŭkom.
Na adnym z kadraŭ vidać, jak čorny i šery voŭk pavolna pierachodziać ručaj i vychodziać na bierah. Inšaje videa, źniataje vosieńniu minułaha hoda, pakazvaje dvuch čornych i šerych vaŭkoŭ, jakija pieraadolvajuć toj ža ručaj.
Bolšaść z 2,5—3 tysiač vaŭkoŭ, jakija žyvuć u Polščy, majuć šeruju afarboŭku. Čornaje futra źjaŭlajecca vynikam hienietyčnaj mutacyi, jakaja, imavierna, uźnikła ŭ svojskich sabak tysiačahodździ tamu.
Ciomnaja afarboŭka vaŭkoŭ redka sustrakajecca ŭ Jeŭropie z-za nizkaj hienietyčnaj raznastajnaści. Ale, naprykład, u Nacyjanalnym parku Jełaŭstoŭn u ZŠA prynamsi pałova papulacyi vaŭkoŭ maje čornaje futra.
Vaŭki žyvuć siamiejnymi hrupami, a pakolki čornyja ekzemplary važać kala 30 kh (jak niamieckija aŭčarki), to Jaana Tačydłoŭskaja miarkuje, što jany źjaŭlajucca adnahodkami i, vierahodna, bratami. Prynamsi adzin ź ich — samiec.
Arhanizacyja SAVE Wildlife Conservation Fund Poland, jakaja 13 hadoŭ sočyć za vaŭkami ŭ Polščy, nie raskryvaje dakładnaje miesca znachodžańnia čornych vaŭkoŭ, kab abaranić ich ad brakańjeraŭ i spynić raspaŭsiud dezynfarmacyi.
Vaŭki byli całkam źnikli ŭ Polščy ŭ 1950-ch hadach, ale ŭ apošnija dziesiacihodździ ich papulacyja adnaviłasia, asabliva ŭ centralnaj častcy krainy.
Na minułym tydni fond SAVE Wildlife Conservation Fund Poland abjaviŭ u fejsbuku pra nazirańnie za čornymi vaŭkami i źviarnuŭsia pa finansavuju padtrymku. Sabranyja srodki dapamohuć finansavać hienietyčnyja daśledavańni, jakija dazvolać lepš zrazumieć mutacyju, adkaznuju za čornuju afarboŭku vaŭkoŭ.
Jak rychtavaŭsia vizit Cichanoŭskaj u Kijeŭ i čamu jon niekalki razoŭ pieranosiŭsia11
Kamientary