Błohierka Lera Jaskievič raskazała, jak vyjści zamuž za miažoj, kali ŭ vas skončyŭsia biełaruski pašpart
Na rukach u biełaruski byŭ tolki prajazny dakumient.
Biełaruska Lera Jaskievič žyvie ŭ Varšavie z 2022 hoda. Jana śpiavačka, muzykant i błohier. U adnym sa svaich videa dziaŭčyna padzialiłasia niekatorymi padrabiaznaściami pra toje, jak zdoleła vyjści zamuž, majučy na rukach tolki prajazny dakumient.
Pa słovach Lery, prapanovu vyjści zamuž jaje małady čałaviek Paša zrabiŭ u sakaviku 2024 hoda. Paśla hetaha jany stali vyśviatlać, jak možna zarehistravać adnosiny.
«Z-za taho, što my žyviom u Polščy i jak by nie muž i žonka, a prosta chłopiec i dziaŭčyna, pa dakumientach heta nie vielmi kamfortna. Kaniečnie, było b lepš, kali b my ŭžo stali adnym cełym. Kali što, nie daj boh, staniecca, vyrašać roznyja pytańni budzie našmat lahčej, kali vy źjaŭlajeciesia siamjoj», — tłumačyć Lera adzin z matyvaŭ.
Pa słovach dziaŭčyny, u jaje maładoha čałavieka byŭ pašpart i aficyjnaja praca. U jaje pašparta niama, a tolki polski dazvoł na žycharstva i prajazny dakumient. Maładyja ludzi vyvučyli ŭ internecie historyi inšych ludziej, jakija taksama zmahli zarehistravać adnosiny z prajaznym dakumientam.
Pieršym varyjantam była Danija. «U Danii Paša znajšoŭ niejkaha pamočnika. My fatahrafavali ŭsie našy dakumienty, adsyłali. Nam vielmi doŭha adkazvali, heta ŭsio vielmi-vielmi doŭha ciahnułasia», — zhadvaje Lera.
U niejki momant adna ź siabrovak raskazała historyju svaich znajomych, jakija zmahli raśpisacca ŭ Hruzii. U hetym im dapamahła miascovaja žycharka Hanna, jakaja akazvaje pasrednickija pasłuhi. Maładyja ludzi źviazalisia ź joj praź miesiendžar.
«Kali my zrazumieli, što Hanna — heta taja žančyna, jakoj my hatovy daviarać, kupili sabie bilety na samalot», — raskazvaje dziaŭčyna i udakładniaje, što kvitki jany nabyli za tydzień da rośpisu. Razam ź imi ŭ Tbilisi prylacieła niekalki ich siabroŭ.
U stalicu Hruzii jany prylacieli rankam u niadzielu, a ŭ paniadziełak, była rehistracyja šlubu. Pierad joj jany pieršy raz sustrelisia z Hannaj.
«Nam treba było padać zajavu na šlub, pravieryć usie dakumienty i ŭsiakaje takoje, paśla čaho my pavinny byli niejki čas niedzie patusavacca. My spłanavali na hety čas pajści ŭ restaran i adznačyć usio. Paśla restaranu my viartajemsia znoŭ u hetaje miesca dla rehistracyi šlubaŭ. Nas raśpisvajuć, addajuć nam našyja dakumienty», — dzielicca Lera.
Paśla, jak raskazvaje dziaŭčyna, ich pasiarednica prastaviła apastyl u dakumienty i arhanizavała ich pierakład. Usio było hatova ŭ čaćvier. Za ŭsie pasłuhi, pa słovach Lery, jany zapłacili prykładna 400-500 dołaraŭ. U Danii, pa jaje słovach, heta ŭsio b kaštavała kala 1000 dołaraŭ.
Dziaŭčyna davodzić, što košt zaležyć ad taho, kolki budzie śviedak na rehistracyi, a taksama kolki apastylaŭ i jak chutka chočacca ich atrymać.
Ciapier čytajuć
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak30
Kamientary