Kiraŭnik pravasłaŭnaha kanała prahnazuje vajnu Rasii z Turcyjaj za vyzvaleńnie Kanstancinopala
Hienieralny dyrektar rasijskaha pravasłaŭnaha telekanała «Spas» Barys Karčeŭnikaŭ blizka da serca pryniaŭ niadaŭniaje źviaržeńnie režymu Bašara Asada ŭ Siryi. Ale ducham nie padaje, i navat bačyć u hetym krynicu natchnieńnia.
Barys Karčeŭnikaŭ uspaminaje, jak niedzie ŭ 2016 hodzie naviedaŭ rasijskuju avijabazu ŭ siryjskim Chmiejmimie i byŭ natchniony tym, što tam pabačyŭ:
«Heta była zusim nie taja vajna, jakuju ja bačyŭ da taho ŭ Čačni i tym bolš nie taja, što my ŭbačym paśla ŭ Navarosii. Heta byŭ niejki idealny paradak, pačućcio siły, pieravahi i vajennaha pośpiechu. […] Ja byŭ pierapoŭnieny zachapleńniem i honaram za našych».
Ciapier ža, pavodle jaho,
«vulicy kvitniejučaj kaliści i śviatoj krainy Blizkaha Uschodu znoŭ patanajuć u kryvi niavinnych achviar, žorstkich raspravach, apahanieńniach chryścijanskich śviatyń, zabojstvach śviatych i ŭ vypuščanych z turmaŭ kryminalnikach i radykałach».
Pry hetym, jak u luboha rasijskaha prapahandysta, u Karčeŭnikava
«niama sumnievaŭ u tym, što adna z hałoŭnych pryčyn padzieńnia Siryi — heta pomsta Rasii za naš pośpiech i budučuju, užo ŭsimi ŭśviadomlenuju, pieramohu ŭ Małarosii».
Ale impierskija apietyty jahonyja pašyrajucca kudy dalej — na tyja terytoryi, pra jakija biasplonna maryli jašče rasijskija impieratary i dziela jakich u svoj čas ubłytalisia ŭ Pieršuju suśvietnuju vajnu, jakaja ŭrešcie Rasijskuju Impieryju i zahubiła.
Barys Karčeŭnikaŭ uspaminaje pra toje, jak turecki samalot F-16 u 2015 hodzie źbiŭ rasijski ŭ niebie nad Siryjaj, i kanstatuje, što «incydent z samalotam tady niejak vyčarpali, ale voraham Turcyja być nie pierastała».
«Dyk voś, skažu dziŭnaje, moža, ale pra heta kazali mnohija praroctvy śviatych: toje, što pačałosia paru dzion tamu ŭ Alepa, skončycca nie ŭ Damasku i naohuł nie ŭ Siryi. A ŭ Stambule. Jaki pierastanie być Stambułam», — publična zajaŭlaje pravasłaŭny prapahandyst.
«Ja razumieju, jak heta moža hučać ciapier dla mnohich, ale nie biantežusia, tamu što vieru tym śviatym, naprykład, starcu Paisiju Śviatahorcu, i inšym, chto pradrakaŭ apošniuju vialikuju vajnu Rasii i Turcyi i vyzvaleńnie Kanstancinopala.
Ja nie viedaju, jak heta budzie i ci ŭbačym my ździajśnieńnie hetych praroctvaŭ pry žyćci, a samaje hałoŭnaje, ci budziem my ich vartyja […].
Ale ŭ ciapierašnich siryjskich padziejach abiacanaje śviatymi prahladaje ŭžo navat nie tolki praz praroctva, ale navat i pa zakonach łohiki», — upeŭnieny jon.
«Nie padajcie ducham, paručyk Špakoŭski». Jak biełaruskija prapahandysty i analityki reahujuć na padziei ŭ Siryi
«Paniki niama. Vorahi chłusiać». Jak asadaŭskaja prapahanda reahuje na pierśpiektyvu padzieńnia ŭłasnaha režymu ŭ Siryi
Chto takija sadyki? Rasijskija vajskoŭcy ŭ Siryi naradzili admysłovy słenh
Pryznačany Asadam pasoł Siryi ŭ Rasii nazvaŭ jahonyja ŭcioki «haniebnymi i źnievažalnymi»
Kamientary