Zimoŭski vyjšaŭ na «ściežku vajny» ź Piatkievič

Pra ŭzajemnuju «simpatyju» staršyni Nacyjanalnaj teleradyjokampanii Alaksandra Zimoŭskaha i pieršaha namieśnika kiraŭnika prezidenckaj administracyi Natalli Piatkievič viadoma daŭno. Ale da času svaje pačućci adno da adnaho jany nie afišavali. Adnak u pieršy dzień viasny Zimoŭski padnios Piatkievič «padarunačak».

Internet-hazieta «Biełaruskija naviny» apublikavała artykuł šefa NDTRK «Ułada takaja apazicyja». I choć imia Natalli Piatkievič tam nie zhadvajecca, častka hetaha tvora moža być rascenienaja jak «najezd» na pieršaha namieśnika prezidenckaj administracyi.

U pryvatnaści, Zimoŭski adznačyŭ, što «kampanija pa vybarach Prezidenta Respubliki Biełaruś A. R. Łukašenki razhortvajecca, à propos, pry poŭnaj adsutnaści aficyjnaj ideałohii». Heta ŭžo važki kamień u aharod Piatkievič, jakaja, jak viadoma, kiruje mienavita pytańniami ideałohii.

Ale šef NDTRK na hetym nie spyniajecca i praciahvaje harezić:

«Niadaŭna ŭzorny biełaruski ideołah byŭ toŭsty, tupavaty i prastadušny.

Pierad tvaram pastaŭlenych zadač jon časam-taki zachoŭvaŭ zdarovy rozum i ćviorduju pamiać albo razam stračvaŭ i toje, i druhoje.

Nie toje ciapier. Ciapier usio tančejšaje, mudrejšaje i chitrejšaje. Atrymaješ ŭ pracu cyrkular – i prosta śmiešna: vidać, što pamiać u aŭtaraŭ ćviordaja, a zdarovaha rozumu jak nie było. Atrymaješ naŭzdahon nastupny – i ździŭlaješsia: adkul uziałosia ŭ ich stolki zdarovaha rozumu? I kudy padziełasia ŭsia ćviordaja pamiać? Nie ideałohija, a ślaza kamsamołki».

Namiok na «ślazu kamsamołki» bolš čym prazrysty. A dla tych, chto ŭsio jašče sumniajecca ŭ tym, što Zimoŭski piša mienavita pra Piatkievič,

nahadaju: mienavita jana na niadaŭnim sieminary ideałahičnych rabotnikaŭ Minskaj vobłaści zajaviła, što treba dziejničać «tančej, mudrej, chitrej».

Zaadno staršynia NDTRK prajšoŭsia pa elektaracie: «Biełaruski narod-bahanosiec maje asablivy dar: kolki jaho ad prorvy ni advodź – jon usio adno da jaje pre». Zatoje nie zabyŭsia pachvalić Alaksandra Łukašenku, nazvaŭšy jaho «hienijem», i vykazać upeŭnienaść u jaho pieraabrańni.

Da apošniaha času Zimoŭski epatavaŭ Piatkievič u asnoŭnym z dapamohaj niedvuchsensoŭnych rezalucyjaŭ, jakija nakładaŭ na cyrkulary, jakija pastupali ad pieršaha namieśnika kiraŭnika prezidenckaj administracyi. U dalejšym dakumienty z paznakami staršyni NDTRK kłalisia ŭ tym liku na stoł jaho namieśnika Alaksandra Martynienki, jaki adnačasova źjaŭlajecca mužam Natalli Piatkievič.

Kab dazvalać sabie takija pikantnyja volnaści ŭ abychodžańni z «žaleznaj łedzi z Karła Marksa, 38», t

reba mieć u hetym ža budynku padtrymku na samym vierchnim paviersie.

Miarkujučy pa ŭsim, Zimoŭski adčuvaje siabie dastatkova ŭpeŭniena, kali pieravodzić supraćstajańnie z zakrytaj fazy ŭ publičnuju śfieru, što ŭ peŭnaj stupieni možna pryraŭniać da «abjavy vajny». Tym samym kiraŭnik NDTRK pastupova raschistvaje pazicyi pieršaha namieśnika kiraŭnika prezidenckaj administracyi i nie vyklučana, što rychtuje hlebu dla jaje adstaŭki ŭ budučyni. Čym adkaža Piatkievič?

Vadzim Liŭnieŭ, Salidarnaść

* * *

Zimoŭski pra situacyju ŭ krainie i adarvanaść Piatkievič ad žyćcia

«Biełaruski narod-bahanosiec maje asablivy dar: kolki jaho ad prorvy ni advodź – jon usio adno da jaje pre». Voś i ciapier u masach śpieje niezadavolenaść i padymajucca hłuchija narakańni.

U subotu cana bienzinu ŭ Biełarusi pierasiahnuła psichałahičnuju miažu $1/litr (u ZŠA – 70,1 centa/litr). Pytańnie: dziela čaho my pierapracoŭvajem 25 miljonaŭ tonaŭ nafty za hod?

Pilulu cudoŭna padsaładzili, pavialičyŭšy ceny na cukar-piasok. Za što ž mułaty i kreoły, žychary ahraharadkoŭ, hnuli śpiny na płantacyjach, ssypajučy ŭ zasieki Radzimy 3,725 młn tonaŭ Beta vulgaris (na 6,4% bolš za płan)?

I voś rabočy i kałhaśnica, što ceły dzień pierahaniali naftu i/abo pałoli sałodki karaniapłod, vychodziać na pramienad. Nastroj u ich pahany, na prymusovuju padpisku ź ich utrymali, jany duchoŭna hałodnyja. Iduć jany, skažam, kulturna adpačyć na «Minsk-Arenu». A tam zamiest tvaru Biełarusi za dziesiać tysiač rubloŭ im prapanoŭvajuć VIA Rammstein pa sto rejchsmarak, dy jašče na halorcy.

I biaruć biedaki z radaści takoj dvuchlitrovy bałon piŭca imia hr. Čapskaha, im horača – viasna idzie! I cana ž hetamu pivu try kapiejki. Jaho i pić – u try hłytki z raskrutkaj. A hramadskaść užo śvišča, jak sałaŭi viasnoj u lesie, niepakoić milicyju. I ŭpajvajuć biedaku štraf u sto dalaraŭ. Što nie dadaje harmonii ŭ siemjach paddanych mocnaj i kvitniejučaj Biełarusi.

Taki sacyjalna-ekanamičny fon nieaficyjnaj kampanii pa vybarach Prezidenta Respubliki Biełaruś A. R. Łukašenki. Pryčym kampanija taja razhortvajecca «à propos, pry poŭnaj adsutnaści aficyjnaj ideałohii».

• 0
• 0
• 0
• 0
• 0
• 0
• 0
• 0