ZŠA rekamiendujuć Ukrainie źnizić pryzyŭny ŭzrost da 18 hadoŭ

Ukrainie varta razhledzieć mahčymaść źnižeńnia pryzyŭnoha ŭzrostu dla vajskovaj słužby z 25 da 18 hadoŭ, zajaviŭ u sieradu vysokapastaŭleny pradstaŭnik administracyi ZŠA, uzmacniajučy cisk na Kijeŭ z metaj umacavańnia bajavych sił hetaj krainy ŭ vajnie z Rasijaj, paviedamlaje Hołas Amieryki.

Razmaŭlajučy z žurnalistami, pradstaŭnik administracyi adznačyŭ, što Ukraina nie mabilizuje i nie navučaje dastatkovuju kolkaść novych sałdat dla zamieny tych, chto hinie na poli boju.

«Ciapier krytyčna važny čałaviečy resurs, — skazaŭ jon. — Rasijanie, pa sutnaści, damahajucca prahresu, stabilnaha prahresu na ŭschodzie, i pačynajuć adciskać ukrainskija linii ŭ Kurskaj vobłaści… Mabilizacyja i bolšaja kolkaść vajskoŭcaŭ mohuć istotna paŭpłyvać na situacyju na hety momant, kali aceńvać ciapierašniuju situacyju na poli boju».

Rasijskija siły demanstrujuć samyja značnyja pośpiechi va Ukrainie ź pieršych dzion uvarvańnia ŭ 2022 hodzie, zachapiŭšy za apošni miesiac terytoryju pamieram z pałovu Łondana, zajavili analityki i vajskovyja błohiery na hetym tydni.

U krasaviku prezident Ukrainy Uładzimir Zialenski padpisaŭ zakon ab źnižeńni pryzyŭnoha ŭzrostu dla ŭdziełu ŭ bajavych dziejańniach z 27 da 25 hadoŭ, pavialičyŭšy kolkaść hramadzianskich asob, jakich vojska moža mabilizavać va ŭmovach vajennaha stanovišča, uviedzienaha paśla pačatku poŭnamaštabnaha rasijskaha ŭvarvańnia ŭ lutym 2022 hoda.

Administracyja Prezidenta Džo Bajdena była rašučym prychilnikam Ukrainy, ale hetaja padtrymka moža źmienšycca, kali abrany prezident Donald Tramp ustupić na pasadu ŭ studzieni. Tramp pryznačyŭ Kita Kiełaha, adstaŭnoha hienierał-lejtenanta, jaki pradstaviŭ jamu płan zaviaršeńnia vajny va Ukrainie, śpiecyjalnym pradstaŭnikom pa hetym kanflikcie.

Krynica ŭ ofisie Uładzimira Zialenskaha zajaviła, što krainie nie chapaje nieabchodnych srodkaŭ dla asnaščeńnia mabilizavanych vojskaŭ.

«Ciapier, z našymi biahučymi namahańniami pa mabilizacyi, u nas nie chapaje, naprykład, braniatechniki dla padtrymki ŭsich pryzvanych sałdat, — skazała krynica. — My nie možam kampiensavać zatrymki ŭ pryniaćci rašeńniaŭ i łancužkach pastavak z boku našych partnioraŭ koštam žyćciaŭ našych sałdat i samych maładych z našych chłopcaŭ».

Amierykanskija ŭłady pryznajuć, što pryciahnieńnie bolš maładych vajskoŭcaŭ źjaŭlajecca palityčna składanym pytańniem dla ŭrada Zialenskaha, i Ukraina abmiarkoŭvała mahčymaść pradastaŭleńnia stymułaŭ dla dobraachvotnaha naboru maładych ludziej, paviedamiŭ inšy pradstaŭnik administracyi ZŠA.

Pa dadzienych krynicy ŭ Ministerstvie abarony Hiermanii, za začynienymi dźviaryma Bierlin taksama zaklikaje Kijeŭ źnizić pryzyŭny ŭzrost.

• 0
• 0
• 0
• 1
• 0
• 2
• 2
• 1