Hetaja navina ździviła navat niemcaŭ: vioska Eteln (Paŭnočny Rejn-Viestfalija) z nasielnictvam 2 tysiačy čałaviek była adznačana Amierykanskim instytutam inžynieraŭ elektratechniki i elektroniki za vysoki ŭzrovień ličbavizacyi.
Naohuł Hiermanija nie słavicca prasunutaściu ŭ halinie anłajn-technałohij (chutčej, naadvarot), ale Eteln u hetych adnosinach, pavodle acenak žury, abyšoŭ navat Hankonh, u jakoha druhoje miesca, piša telehram-kanał «Što tam u niemcaŭ».
Što mienavita robić Eteln «razumnym» horadam? Naprykład, u miascovych žycharoŭ jość dadatki dla roznych pasłuh: možna, naprykład, zapytać pajezdku na transparcie, apublikavać abjavu abo źviazacca z kiraŭnikom pasielišča.
Kožny žychar moža biaspłatna zabraniravać dla svaich patreb ahulny elektramabil abo hruzavy elektrarovar — dastupnaść možna adsočvać u dadatku. Tam adlustroŭvajecca navat, nakolki zapoŭnieny viaskovy kantejnier dla staroha adzieńnia.
Ukaranieńnie ahulnadastupnych technałohij u Etelnie było b niemahčyma biez udziełu samich žycharoŭ.
Naprykład, hrupa z 60 čałaviek prakłała 30 kiłamietraŭ optavałaknovaha kabiela, pryznačanaha dla pieradačy danych. Žychary Etelna zajmalisia hetym u volny čas — na prakładku kabiela spatrebiłasia bolš za try tysiačy pracoŭnych hadzin.
Jašče adna važnaja raspracoŭka — «ličbavy dvajnik» vioski ŭ internecie. Jon dazvalaje madelavać niebiaśpiečnyja situacyi, takija jak pavodka, tak što luby žychar moža daviedacca, jak budzie vyhladać vioska ŭ vypadku nadzvyčajnaha zdareńnia i jak treba siabie pavodzić u takoj situacyi.
«Usio, što my stvaryli, moža być vykarystana i ŭ inšych vioskach», — zajaviŭ kiraŭnik pasielišča Ulrych Ale.
Pavodle jaho słoŭ, viosku ŭžo naviedali ŭłady dziasiatkaŭ niamieckich municypalitetaŭ — kab pieraniać dośvied Etelna.
Ciapier čytajuć
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny38
Kamientary