Kansiervatyŭnuju partyju Brytanii ŭpieršyniu ŭznačaliŭ ciemnaskury palityk

Jašče ŭ 2019 hodzie tory — partyja Uinstana Čerčyla, Marharet Tetčar i Borysa Džonsana — atrymała na vybarach mocnuju bolšaść, ale ŭžo ŭ červieni 2024-ha paciarpieła samuju bujnuju parazu ad lejbarystaŭ u sučasnaj historyi. Z 365 deputataŭ 650-miascovaj Pałaty hramadaŭ u ich zastałosia tolki 121.

Tady i adbylisia dziŭnyja spabornictvy pamiž pretendentami na rolu kapitana patanułaha «Tytanika», u jakich spačatku biassprečna lidziravaŭ umierany kandydat, były ministr zamiežnych spraŭ Džejms Klevierli, ale ŭ vyniku pieramahła pradstaŭnica krajnie pravaha kryła Kiemi Badenak, eks-ministr handlu ŭ kabiniecie Sunaka. Suprać jaje vystupaŭ jašče bolš radykalny eks-ministr imihracyi Robiert Dženryk, jaki pabudavaŭ kampaniju na antyimihracyjnaj rytorycy.

U vyniku pieramohu atrymała Badenak, jakaja prapanavała členam Kansiervatyŭnaj partyi pry vybary novaha lidara hałasavać za tych, chto im asabista bolš impanuje, a nie za tych, chto abiacaje zrabić toje, što im impanuje.

Pakolki nastupnyja vybary ŭ parłamient tolki praź piać hadoŭ, zaraz havorka idzie pra adnaŭleńnie davieru da tory, a nie pra baraćbu za ŭładu.

Badenak stała pieršaj u historyi čarnaskuraj na pasadzie lidara viadučaj palityčnaj partyi Vialikabrytanii. Jana naradziłasia ŭ siamji vychadcaŭ ź Nihieryi.

Pavodle Dženryka, tory prajhrali vybary, bo miljony brytancaŭ prahałasavali za antyimihracyjnuju partyju «Reforma» Najdžeła Faradža. Dženryk faktyčna zaniaŭ anałahičnuju pazicyju i zaklikaŭ denansavać Jeŭrapiejskuju kanviencyju pa pravach čałavieka. Badenak nie takaja radykalnaja ŭ pytańni imihracyi, jakoje turbuje tolki pałovu brytancaŭ, ale publična vykazvałasia razčej za Dženryka pa inšych pytańniach i zavajavała reputacyju pravakacyjnaha palityka.

Apytańni členaŭ kansiervatyŭnaj partyi pakazvajuć, što jany addali pieravahu b bolš umieranamu kandydatu. I taki kandydat u ich navat byŭ — Džejms Klevierli ŭpeŭniena lidziravaŭ u honcy za kresła staršyni apazicyjnaj partyi, adnak niečakana finišavaŭ trecim u papiarednim hałasavańni deputataŭ frakcyi tory.

Miž dvuma finalistami — Badenak i Dženrykam — vybirali ŭžo nie deputaty, a prostyja členy partyi. Klevierli maŭčaŭ da kanca hetych spabornictvaŭ, ale ŭ piatnicu hazieta FT apublikavała jaho pieršyja pryznańni, zroblenyja za abiedam u šykoŭnym łondanskim restaranie.

«Trochu było nie pa sabie… uf, jak udar u žyvot», — pryznaŭsia vidavočny favaryt honki, u vyniku jaki apynuŭsia na halorcy parłamienta.

Jon vinavacić taktyčnaje hałasavańnie: jaho prychilniki vybirali jamu zručnaha supiernika dla finalnaha raŭnda, ale ŭ vyniku pierastaralisia, i jamu samomu nie chapiła hałasoŭ dla vychadu ŭ finał.

«Ja kazaŭ im šmat razoŭ: nie treba hetaj kremlenałohii, — cytuje FT pryznańni Klevierli za abiedam z baraninaj i parfe z kačynaj piečani. — Ale ja vynies važny ŭrok: zaŭsiody treba hałasavać za, a nie suprać».

• 0
• 3
• 1
• 2
• 2
• 0
• 0
• 0