Kolkaść palitviaźniaŭ apuściłasia nižej za 1300 čałaviek. Heta najmienšy lik za dva hady

Na hety momant u śpisie palitviaźniaŭ na sajcie «Viasny» znachodziacca 1287 čałaviek. Heta ahromnistaja ličba, jakaja śviedčyć pra toje, što ŭzrovień represij, jakija razharnulisia pa ŭsioj krainie paśla vybaraŭ-2020, usio jašče zaškalvaje.

Razam z tym apošnim časam nazirajecca tendencyja na skaračeńnie kolkaści palitviaźniaŭ. Naprykład, paŭhoda nazad pravaabaroncy kazali pra bolš čym 1500 čałaviek. Apošni raz kolkaść palitviaźniaŭ trymałasia na ŭzroŭni kala 1300 čałaviek letam 2022 hoda.

Za košt čaho zaraz źmienšyłasia kolkaść palitviaźniaŭ?

Biezumoŭna, majuć značeńnie niekalki chvalaŭ pamiłavańnia. Za apošnija miesiacy daterminova vyjšli na svabodu 120 čałaviek. Častka ź ich nie dasiadzieła da kanca terminu ŭsiaho miesiac-dva ci navat niekalki tydniaŭ, adnak jość i tyja, u kaho zrezałasia adčuvalnaja častka terminu.

Štomiesiac dziasiatki palitviaźniaŭ vychodziać, adbyŭšy svaje terminy da kanca. Užo vyzvaliłasia absalutnaja bolšaść kamientataraŭ, asudžanych paśla zabojstva prahramista Andreja Zielcera — a heta sotni čałaviek. Vychodziać na svabodu tyja biełarusy, chto byli aryštavanyja na pieršych žnivieńskich pratestach i atrymali 4-5 hadoŭ źniavoleńnia.

Da taho ž treba razumieć, što ŭ ciapierašnich umovach, kali luby kantakt z pravaabaroncami pahražaje novaj kryminalnaj spravaj, «Viasna» nie zaŭždy chutka atrymlivaje infarmacyju pra vyzvaleńnie źniavolenych. Lubaja paŭnavartasnaja pierapravierka śpisu palitviaźniaŭ pryvodzić da taho, što možna znajści niekalki dziasiatkaŭ čałaviek, u jakich užo adnaznačna skončyŭsia termin. Niekalki takich «inśpiekcyj» — i śpis palitviaźniaŭ skaračajecca istotna.

Ci možna ličyć, što zaraz u Biełarusi 1287 palitviaźniaŭ? Naturalna, nie

U śpisach pravaabaroncaŭ niama dziasiatkaŭ (a moža, i sotniaŭ) čałaviek, pra zatrymańnie jakich hramadstva prosta nie viedaje. Častka ich traplaje ŭ śpis palitviaźniaŭ paśla sudoŭ, ale i ŭ hetaj sistemie jość vyklučeńni. Dastatkova zhadać historyju ź niemcam Kryhieram — pra aryšt jakoha nichto i nie viedaŭ.

Ci možna ličyć, što hradus represij źmianšajecca? Taksama nie

Pa-raniejšamu ludziej chapajuć za kamientary, za danaty, za ŭdzieł u daŭnich pratestach. Dziasiatki palitviaźniaŭ atrymlivajuć dadatkovyja terminy za «niepadparadkavańnie» administracyi kałonii. Pravavoje biaspraŭje trymajecca na pikavym uzroŭni.

• 2
• 0
• 3
• 1
• 1
• 1
• 4
• 0