Biełaruskaja škoła ŭ Varšavie zaprašaje na navučańnie biełaruskich dzietak z roznych krain śvietu
Biełaruskaja škoła ŭ Varšavie ŭžo treci hod adčyniaje dźviery svaim vučniam z roznych krain śvietu. Heta samaja vialikaja biełaruskaja adukacyjnaja placoŭka za miažoju. Za dva hady dziejnaści jana značna pašyryłasia ŭ prastory, kolkasnym i jakasnym stanie. Jašče možna paśpieć padać zajavu na 2024/25 navučalny hod. Dla hetaha treba zapoŭnić ankietu pa spasyłcy.
«U minułym hodzie da nas pastupiła bolš za paŭtysiaču zajaŭ ad baćkoŭ, jakija žadali b, kab ich dzieci vučylisia ŭ našaj ustanovie i jaje filijałach. Darečy, daloka nie kožnaja biełaruskaja škoła na radzimie, dzie ciapier vučycca pa-biełarusku mienš za 10% ad usich školnikaŭ, maje takuju kolkaść», — kaža dyrektar škoły Aleś Łozka.
«Havoračy pra hieahrafiju BŠV, treba zaŭvažyć, što ŭ jaje ŭvachodzili nami arhanizavanyja filijały (škołki vychodnaha dnia) u Biełastoku, Hdańsku, Krakavie, a taksama asobnyja, jakija padtrymlivalisia nami, u Batumi, Tbilisi (Hruzija) i Vilni (Litva), — raskazvaje Aleś Łozka. — Samym vialikim filijałam źjaŭlajecca naša adździaleńnie, na jakim arhanizavana anłajn-navučańnie.
A heta — bolš za paŭtary sotni biełaruskich dziaciej, što vučylisia ci praciahvajuć navučańnie, pradstaŭniki z Abjadnanych Arabskich Emirataŭ, Ałbanii, Anhlii, Aŭstryi, Bałharyi, Biełarusi, Hiermanii, Hruzii, ZŠA, Irana, Irłandyi, Ispanii, Italii, Kanady, Kipra, Łatvii, Litvy, Małdovy, Partuhalii, Polščy, Rasii, Turcyi, Ukrainy, Francyi, Čarnahoryi, Čechii, Šviecyi, Japonii.
Anłajn-zaniatki ŭ 1-10 kłasach pravodzilisia pa dva ŭroki dva razy na tydzień u 17 kłasach-kamplektach. Raskład u paralelach praduhledžvaje najaŭnaść varyjantaŭ vybaru zhodna z časavym pojasam pražyvańnia navučenca».
Pa infarmacyi Alesia Łojki, najbolšy kantynhient va ŭsioj škole — vučni pačatkovych kłasaŭ. U anłajn-navučańni davodzicca stvarać pa try kłasnyja paraleli. Akramia nastaŭnickich zum-kanfierencyj, ahulnych čataŭ, kožny kłas mieŭ ułasny, kab adbyvalisia pazaškolnyja znosiny nastaŭnikaŭ ź dziećmi i baćkami.
U dystancyjnym navučańni pieravažnaja bolšaść dziaciej z roznych haradoŭ Polščy, a taksama nie adzinkavyja pradstaŭniki z Kipra, Biełarusi, ZŠA, Partuhalii, Hruzii, Turcyi, Rasii, Ukrainy i inš.
U sistemie BŠV było zaniata bolš 40 piedahohaŭ. Heta śpiecyjalisty, jakija majuć dobry vopyt, ułasnyja mietadyčnyja napracoŭki, navučalnyja dapamožniki, prafiesijnyja katehoryi i navat vučonyja zvańni.
Vučniami škoły stanoviacca dzieci, jakija atrymlivajuć viedy pa asnoŭnych pradmietach va ŭstanovach krainy pražyvańnia, a pa pradmietach biełaruskaha kampanienta (rodnaj movie i litaratury, historyi i kultury Biełarusi i inš.), jakich niama ŭ prahramach zamiežnych škoł — na dadatkovych zaniatkach u BŠV.
Heta dazvalaje navučencam nie adstać pa viedach ad svaich adnahodkaŭ na radzimie i ŭ najlepšy čas praciahnuć navučańnie tam abo zdać eksternam ekzamieny dla atrymańnia adpaviednaha siertyfikata ŭ Biełarusi.
U afłajn-filijach taksama možna naviedvać mastackija hurtki, udzielničać u roznych śviatach i inšych aktyŭnaściach. Zaniatki ŭ nulavych-dziasiatych kłasach pravodziacca zvyčajna pa subotach da piaci hadzin anłajn, dystancyjna — uroki ŭ paralelnych kłasach pa vybary: prydatnyja hrupa, dzień, čas.
Škoła jašče prymaje zajavy-ankiety. Kožnaja filija maje svoj čas pačatku zaniatkaŭ. Varšaŭskaja sioleta aryjentujecca na 1 vieraśnia, ale pa julijanskim kalendary, h. zn. 14 vieraśnia, dystancyjnaje navučańnie — mahčyma, u listapadzie, pra što indyvidualna paviedamiać baćkam vučniaŭ.
Kamientary