Što aznačaje zakryćcio rekrutynhavaha centra pałka Kalinoŭskaha ŭ Varšavie?

«Ja, Pavieł Kuchta, kiraŭnik mabilizacyjnaha centra pałka imia Kastusia Kalinoŭskaha, vymušany paviedamić, što rekrutynhavy centr u Varšavie bolš nie dziejničaje ŭ suviazi z rašeńniem kiraŭnictva Internacyjanalnaha lehijona pravodzić rekrutynh biełarusaŭ praź ich ułasnuju sistemu va Ukrainie, — kaža ŭ zvarocie Kuchta. — My sa škadavańniem pryniali hetuju navinu, bo naš centr dazvalaŭ biełarusam chutka i biaśpiečna traplać u połk Kalinoŭskaha i prachodzić navučańnie na ŭłasnaj bazie razam ź inšymi biełarusami».

Jakija buduć praktyčnyja nastupstvy hetaha? Niaŭžo nabor biełaruskich dobraachvotnikaŭ całkam spyniajecca? 

Surazmoŭcy «Našaj Nivy», abaznanyja ŭ spravach pałka i blizkija da ciapierašniaha kamandavańnia, kažuć, što pryncypova nie źmianiajecca ničoha. Čat-bot pałka pracuje.

Pry zachodzie na sajt pałka Kalinoŭskaha možna ŭbačyć knopku «rekrutam», jakaja viadzie na telehram-bot, u jakim achvotnym raskažuć pra ałharytm dziejańniaŭ dla prajezdu va Ukrainu i ŭstupleńnia ŭ Internacyjanalny lehijon, da jakoha naležyć i połk imia Kastusia Kalinoŭskaha. 

Adtul čałaviek budzie raźmierkavany ŭ biełaruskaje padraździaleńnie. 

«Časy źmianilisia. Vialikaha sensu ŭ pasiarednikach u Varšavie niama, biełaruskaje padraździaleńnie padparadkavanaje ŭkrainskamu kamandavańniu, i ŭsia taja padrychtoŭčaja rabota, jakaja pravodziłasia ŭ Varšavie, moža i budzie pravodzicca va Ukrainie, dzie i idzie vajna», — z takim mierkavańniem salidaryzujucca apytanyja nami bajcy. 

Ludzi taksama kažuć, što centr u Varšavie možna było b i nie razhaniać, ale heta ŭsio nastupstvy baraćby za ŭładu ŭnutry arhanizacyi. Maŭlaŭ, Pavieł Kuchta bolš łajalny papiaredniamu kiraŭnictvu, i toje, što ź im nie znajšli ahulnaj movy novyja načalniki — sprava łahičnaja.

Telehram-kanał pałka, u jakim było apublikavana paviedamleńnie Kuchty, pa śćvierdžańniach ciapierašnich i byłych bajcoŭ, kantralujecca adchilenymi ad kamandavańnia ludźmi — Mikołam Dziemidzienkam i Arciomam «Vanišam» Vojničam. 

Rekrutynhavy centr u Varšavie syhraŭ rolu ŭ 2022 hodzie, kali masy aktyŭnych biełarusaŭ, jakija akazalisia ŭ emihracyi i chacieli dapamahčy Ukrainie vajavać z rasijskim fašyzmam, mahli centralizavana, hrupami, z adnaho miesca vyjazdžać va Ukrainu. Prajšoŭšy pry hetym bazavuju miedycynskuju i inšuju padrychtoŭku ŭ čas čakańnia dazvołu na ŭjezd. 

Ciapier ža dazvoły na ŭjezd buduć vydavacca praz dypłamatyčnyja ŭstanovy Ukrainy ŭ indyvidualnym paradku, sychodziačy z vynikaŭ sumoŭja. 

• 6
• 6
• 7
• 0
• 1
• 2
• 0
• 2