Dyrektar FBR: Kruks pierad zamacham na Trampa šukaŭ padrabiaznaści zabojstva Kienedzi Li Charvi Osvaldam
Taksama Kruks z dapamohaj drona vyvučaŭ terytoryju praviadzieńnia mitynhu prykładna za dźvie hadziny da vychadu Trampa na scenu.
20-hadovy Tomas Mećju Kruks, jaki stralaŭ u Donalda Trampa na pieradvybarnym mitynhu ŭ Piensilvanii, za niekalki dzion da zamachu šukaŭ u internecie padrabiaznaści zabojstva prezidenta ZŠA Džona Kienedzi, paviedamiŭ dyrektar FBR Krystafier Rej na słuchańniach u Kanhresie, piša Bi-bi-si
Pavodle jaho słoŭ, praviedzieny ahientami analiz noŭtbuka Kruksa pakazaŭ, što jon, u pryvatnaści, cikaviŭsia, na jakoj adlehłaści ad prezidenta znachodziŭsia Li Charvi Osvald, jaki zastreliŭ Kenedzi ŭ Dałasie ŭ listapadzie 1963 hoda.
«6 lipienia jon zrabiŭ pošukavy zapyt u Google: «Jak daloka Osvald znachodziŭsia ad Kienedzi», — skazaŭ Rej čalcam kamiteta ŭ pytańniach sudavodstva Pałaty pradstaŭnikoŭ ZŠA. — Hety zapyt, vidavočna, maje vialikaje značeńnie z punktu hledžańnia jaho dušeŭnaha stanu».
«U toj ža dzień jon, miarkujučy z usiaho, zarehistravaŭsia dla ŭdziełu ŭ mitynhu ŭ Batlery», — skazaŭ kiraŭnik FBR.
Rej taksama paviedamiŭ, što Kruks z dapamohaj drona vyvučaŭ terytoryju praviadzieńnia mitynhu prykładna za dźvie hadziny da vychadu Trampa na scenu.
Bieśpiłotnik znachodziŭsia ŭ pavietry na praciahu 11 chvilin. Dron i pult ad jaho byli znojdzieny ŭ mašynie strałka razam z dvuma vybuchovymi pryładami. Jašče adnu bombu vyjavili ŭ domie Kruksa, dadaŭ Rej.
Dyrektar FBR skazaŭ, što pakul nie źjaviłasia nijakich dokazaŭ taho, što ŭ Kruksa byli saŭdzielniki, i jon, miarkujučy pa ŭsim, dziejničaŭ u adzinočku.
«Ja ŭžo niekatory čas kažu, što my žyviem va ŭmovach pavyšanaj pahrozy. Strałok moža być miortvy, ale rasśledavańnie FBR praciahvajecca», — skazaŭ na zakančeńnie Rej.
Zamach na Donalda Trampa adbyŭsia 13 lipienia padčas pieradvybarčaha mitynhu ŭ Batlery, štat Piensilvanija. Tomas Mećju Kruks adkryŭ ahoń ź vintoŭki typu AR-15 praź niekalki chvilin paśla taho, jak Tramp pačaŭ vystup.
Adna z kul prajšła za niekalkich milimietraŭ ad hałavy eks-prezidenta i začapiła pravaje vucha. Dvoje ŭdzielnikaŭ mitynhu byli ciažka paranienyja, a 50-hadovy pažarny ź Piensilvanii — zabity.
Kruks, jaki znachodziŭsia na dachu budynka niepadalok, byŭ zastreleny snajpieram Sakretnaj słužby mienš čym praz 30 siekund paśla taho, jak zrabiŭ pieršy z vaśmi strełaŭ.
Dyrektar FBR paćvierdziŭ, što na dachu, dzie znachodziŭsia Kruks, było znojdziena vosiem hilzaŭ.
Dyrektar Sakretnaj słužby ZŠA Kimbierli Čytł pakinuła svaju pasadu ŭ aŭtorak paśla taho, jak raniej na hetym tydni dała pakazańni ŭ inšym kamitecie Pałaty pradstaŭnikoŭ.
Jana sutyknułasia z zaklikami demakrataŭ i respublikancaŭ syści ŭ adstaŭku paśla napružanych słuchańniaŭ, padčas jakich nazvała zamach na Trampa «samym surjoznym pravałam Sakretnaj słužby za apošnija dziesiacihodździ».
Kamientary