Levaja kaalicyja atrymała pieramohu na vybarach u Francyi. Ultrapravyja — na trecim miescy
Pry hetym nivodnaj palityčnaj sile nie ŭdałosia atrymać bolšaści ŭ parłamiencie.
Kaalicyja levych partyj «Novy narodny front» (NPF) atrymała pieramohu ŭ druhim tury parłamienckich vybaraŭ u Francyi i atrymała 182 miescy ŭ Nacyjanalnym schodzie, śviedčać aficyjnyja danyja MUS krainy, piša Bi-bi-si.
Druhoje miesca zaniała centrysckaja kaalicyja «Razam» prezidenta Emanuela Makrona (168 miescaŭ), treciaje — ultrapravaje «Nacyjanalnaje abjadnańnie» (RN) Maryn Lo Pien i Žardana Bardeła, jakoje atrymała 143 miescy. Jaŭka na vybarach skłała 66,63%.
Pry hetym nivodnaj palityčnaj sile nie ŭdałosia atrymać bolšaści ŭ parłamiencie.
U Nacyjanalnym schodzie zasiadajuć 577 deputataŭ, dla bolšaści nieabchodna 289 miescaŭ.
«Nacyjanalnaje abjadnańnie» zaniało pieršaje miesca pa vynikach pieršaha tura i spadziavałasia na vysoki vynik padčas niadzielnaha hałasavańnia, adnak pierad druhim turam levyja i prychilniki Makrona abjadnali namahańni, kab praduchilić pieramohu ŭltrapravych.
«Haniebnyja sajuzy pieraškodzili francuzam atrymać palityku, nakiravanuju na adnaŭleńnie krainy«, — zajaviŭ, kamientujučy vyniki hałasavańnia, lidar «Nacyjanalnaha abjadnańnia» Žardan Bardeła.
Prezident Francyi Emanuel Makron pryznačyŭ daterminovyja vybary ŭ pačatku červienia paśla pieramohi francuzskich ultrapravych na vybarach u Jeŭraparłamient.
«My zasmučanyja, rasčaravanyja, ździŭlenyja hetym vynikam», — skazała Roza, prychilnica «Nacyjanalnaha abjadnańnia», trymajučy ŭ adnoj ruce francuzski ściah, a ŭ druhoj amal pusty kielich šampanskaha.
«My stali achviarami niesumlennaha aljansu, jaki ŭznačalvaje Makron, kab nie dapuścić nas da ŭłady».
U štab-kvatery partyi panavała poŭnaja cišynia, kali źjavilisia pieršyja prahnozy i stała zrazumieła, što čakańni nie apraŭdalisia, i partyju adkinuła na treciaje miesca.
Prysutnyja apładziravali Žardanu Bardeła — lidaru partyi, jaki zajaviŭ prychilnikam, što rana ci pozna pieramoha budzie za imi. Maryn Lo Pien vitali krykami «Maryn, prezident».
«My pavinny praciahvać naroščvać našu padtrymku. I 2027 hod-nastupnyja prezidenckija vybary — budzie našym», — skazaŭ adzin z prychilnikaŭ partyi.
Kamientary