U davieranaj asoby Łukašenki zabrali biznes pad Hrodnam: «Na paroh vyjšaŭ niejki mužyk i zajaviŭ, što ŭpieršyniu mianie bačyć»

U Barbašynskaha spytalisia, čamu jon nie tak daŭno pierajechaŭ z Hrodna nazad u Minsk, u adkaz na što jon raskazaŭ historyju pra raspad biznesu, jaki paśpiachova šmat hadoŭ vioŭ ź niamieckimi partniorami. Na heta, pavodle jaho słoŭ, paŭpłyvali sankcyi.

U biełaruska-niamieckaj kampanii «Biełabiedzinh», jakuju ŭ svoj čas zapuścili ŭ svabodnaj ekanamičnaj zonie «Hrodna», Barbašynski byŭ dyrektaram, i raźvivałasia pradpryjemstva, jak jon śćviardžaje, paśpiachova: kali spačatku ŭ im pracavali 27 čałaviek, to paśla štaty razraślisia da 230.

Zajmałasia pradpryjemstva drevaapracoŭkaj i šviejnaj vytvorčaściu: rašotki dla artapiedyčnych matracaŭ, čachły, matracy, koŭdry, paduški, łožki, kanapy. Adhružali, pavodle słoŭ byłoha dyrektara, pa 25 hruzavikoŭ na tydzień, pry hetym 85 pracentaŭ išło na ekspart pa ŭsioj Jeŭropie.

Paśla ž uviadzieńnia sankcyj usio heta ruchnuła, i Barbašynski na svaich byłych partnioraŭ pakryŭdžany:

«Jeŭrapiejcy, nazyvajučy rečy svaimi imionami, nas kinuli. Usio da ahidnaści prosta: u adzin cudoŭny dzień pa zahadzie kiraŭnictva hałaŭnoha pradpryjemstva mianie nie puścili na paroh fabryki, u raźvićcio jakoj ukłaŭ vielizarnuju kolkaść sił, času i dušu. Na paroh vyjšaŭ niejki mužyk i zajaviŭ, što ŭpieršyniu mianie bačyć i viedać nie viedaje».

Vinavacić u hetym jon niamieckich partnioraŭ, znajomych jašče z časoŭ hulniavoj karjery ŭ Hiermanii, i robić na asnovie svajoj ułasnaj historyi abahulnieńni:

«Ci ździŭleny ja? Mabyć, nie. Heta ž čysta zachodniaja historyja: biznes i ničoha asabistaha. Pry ŭźnikłaj dylemie «hrošy abo čałaviečyja adnosiny» jany biez usialakich vahańniaŭ vybrali hrošy. Tak było i tak budzie».

54-hadovy Andrej Barbašynski rodam z Ašmianaŭ. Staŭ viadomym za košt hulni ŭ minskim SKA, u 1990-ja hulaŭ u kłubach ź Ispanii, Vienhryi i Hiermanii. U 1992-m staŭ alimpijskim čempijonam u składzie zbornaj SND. U handbolnych spravach i dahetul jon člen vykankama Nacyjanalnaha alimpijskaha kamiteta na čale ź Viktaram Łukašenkam i namieśnik staršyni Biełaruskaj fiederacyi handboła.

U 2020 byŭ davieranaj asobaj Alaksandra Łukašenki padčas prezidenckich vybaraŭ. Padtrymlivaŭ jaho i paśla, skazaŭšy siarod inšaha: «Kali spatrebicca, ja hatovy ŭziać u ruki aŭtamat i stać pobač plačom da plača z prezidentam».

Ale heta nie źbierahło jaho ad traplańnia ŭ niamiłaść. Sioleta Barbašynski źbiraŭsia bałatavacca ŭ Hrodzienski abłasny saviet pa Ašmianskaj vybarčaj akruzie i ličyŭsia najbolš realnaj kandydaturaj na pryznačeńnie ŭ jaho, ale ŭ apošni momant jaho čamuści nie zarehistravali.

• 9
• 1
• 38
• 0
• 0
• 0
• 0
• 1