Damy zvyčajnych ludziej pačynajucca za 50 mietraŭ ad składa bojeprypasaŭ, što kateharyčna zabaroniena. Zatoje biaśpiečnuju dystancyju na vypadak uzryvu zachavaŭ kiraŭnik viciebskaj viertykali sa svaimi čynoŭnikami.
Skład bojeprypasaŭ pad samymi chatami
Źviestki pra niadaŭnija pažary na ŭkrainskich składach bojeprypasaŭ, z-za jakich byŭ amal na sutki paralizavany čyhunačny ruch, prymusili zadumacca i žycharoŭ Viciebsku. Niechta zhadaŭ, što na haradskoj uskrainie taksama jość schovišča zbroi. I raźmieščana jano samym niebiaśpiečnym čynam. Vybuchovyja prystasavańni ahulnaj vahoj u niekalki socień ton naležać 317-j asobnaj hvardziejskaj mabilnaj bryhadzie. Ale ž zachoŭvajucca jany dastatkova daloka ad miesca dysłakacyi vajskoŭcaŭ i niebiaśpiečna blizka ad mirnych žycharoŭ – u vioscy Ułanavičy, jakaja ciapier uvachodzić u miežy horada.
Miascovyja žychary majuć małapryjemnaje susiedstva: adlehłaść ad schovišča bajavych snaradaŭ da bližejšaje chaty składaje nie bolš jak 50 mietraŭ. Miž tym dziaržaŭnymi dakumientami praduhledžany zusim inšyja normy: 18 studzienia 2000 hoda Saviet ministraŭ pryniaŭ pastanovu, zhodna ź jakoj navat źniešniaja aharodža vakoł vajskovych składoŭ musić znachodzicca nie mienš jak za try kiłamietry ad lubych «cyvilnych» žyłych pabudoŭ.
Bolš taho: pastanova Saŭminu zabaraniaje budaŭnictva damoŭ i praviadzieńnie sielskahaspadarčych rabot u hetaj trochkiłamietrovaj zonie vakoł vajskovych składoŭ. Ale ŭ Viciebsku, padobna, na toje patrabavańnie nie zvažajuć: pobač sa schoviščam bojeprypasaŭ znachodzicca pryvatny siektar i niekalki pasiołkaŭ, zabudavanych leciščami.
Zatoje na «zakonnaj» adlehłaści dom viciebskaha mera
Žychary Viciebska, jakija nie chočuć žyć na «bočcy z poracham», napisali zvarot da staršyni harvykankamu Piatra Drazdova, kab jon niejak paspryjaŭ vyrašeńniu situacyi. Niechta z aŭtaraŭ lista padličyŭ, što adlehłaść ad składoŭ da rezidencyi mera jakraz i składaje naležnyja pavodle zakonu try kiłamietry. A voś da centru horada z bolš jak 320-tysiačnym nasielnictvam adlehłaść mienšaja, tak što ŭ vypadku pažaru abo vybuchu čałaviečych achviaraŭ paźbiehnuć naŭrad ci ŭdasca.
Viadoma, što va Ŭłanavičach zachoŭvajucca 60 umoŭnych vahonaŭ sa zbrojaj. Ź jakoj mienavita – dakładna nieviadoma, vajskovaja tajamnica... Nastupstvy vierahodnych trahičnych vypadkovaściej, pavodle rasparadžeńnia mera Viciebska Piatra Drazdova, ciapier sprabujuć sprahnazavać u miascovaj upravie Ministerstva nadzvyčajnych situacyj. Ad vysnovaŭ supracoŭnikaŭ MNS i budzie zaležać dalejšy los niebiaśpiečnaha susiedstva mirnych žycharoŭ Viciebsku i vajskovych składoŭ.
Alona Štral, Prydźvińnie № 5, žnivień
Kamientary