«Vymyŭ padłohu rasijskim pasłom». U kabiniecie polskaha ministra Sikorskaha zaŭvažyli karykaturu pra Niabienziu
Čym pradstaŭnik Rasii ŭ AAN zasłužyŭ sabie miesca ŭ polskim kabiniecie?
U pracoŭnym kabiniecie kiraŭnika MZS Polščy Radasłava Sikorskaha ŭ Varšavie žurnalisty BILD razhledzieli pracu polskaha karykaturysta Andžeja Mileŭskaha dla Gazeta Wyborcza ad 28 lutaha hetaha hoda. Na malunku prybiralščyca budynka AAN pytajecca kalehu: «Čamu tut tak čysta?» Toj adkazvaje: «Polski ministr vymyŭ padłohu rasijskim pasłom».
Tady Sikorski rezka raskrytykavaŭ pastajannaha pradstaŭnika Rasii Vasila Niebienziu na Radzie Biaśpieki AAN. Naprykład, Niebienzia nazvaŭ ukraincaŭ «nacystami» i zajaviŭ ab karupcyi va Ukrainie. Sikorski adkazaŭ, što tam «prezident — habrej, ministr abarony — musulmanin, i ŭ ich niama palitviaźniaŭ», a «Alaksiej Navalny zadakumientavaŭ, nakolki sumlennyja i niepadkupnyja ŭłady vašaj krainy».
Niebienzia skazaŭ, što Polšča napała na SSSR padčas Druhoj suśvietnaj.
«Pra što jon kaža? Heta Saviecki Sajuz napaŭ na Polšču razam z nacysckaj Hiermanijaj 17 vieraśnia 1939 hoda. Jany navat praviali ahulny parad Pieramohi 22 vieraśnia, — paryravaŭ Sikorski. — A što rabili ruskija vojski kala bramy Varšavy ŭ žniŭni 1920 hoda? Jany byli tam na ekskursii?»
Na słovy Niebienzi ab zmovie Zachadu vakoł Ukrainy Sikorski adkazaŭ: «Maja vam parada: nie traplajcie ŭ pastku Zachadu, vyviedzicie svaje vojski ŭ adpaviednaści ź mižnarodna-pryznanymi miežami i paźbiahajcie hetaj zachodniaj zmovy».
Kamientary