«Apakalipsis. Takaja pryhažość»: Hanna Šarkunova padzialiłasia ŭražańniami ad bury ŭ Dubai
U Dubai zdaryłasia samaja mocnaja za apošnija 75 hadoŭ zaleva. Mašyny amal pieratvarylisia ŭ padvodnyja łodki, mebla litaralna vylatała z bałkonaŭ chmaračosaŭ, aeraport byŭ vymušany spynić pracu. Svaimi ŭražańniami ad bury z «Našaj Nivaj» padzialiłasia śpiavačka Hanna Šarkunova.
Artystka žyvie ŭ Dubai kala dvuch hadoŭ.
— Kožny raz, kali tut doždž, žyćcio spyniajecca. Škoły adrazu začyniajuć, usie viedajuć, što ŭ hety dzień lepš zastacca doma. Ale zaraz było niešta niezvyčajnaje, epičnaje i złaviesnaje. Heta byŭ samy mocny doždž za apošnija 75 hadoŭ.
Pakul adny byli ŭ žachu, a inšyja žartavali na temu taho, što zaraz aktualnyja łodki-taksi (niechta nasamreč papłyŭ pa vulicy ŭ bajdarcy), Hanna zachaplałasia pryrodaj. Jana pakazała ŭ storys zastyłaje koła ahladu. Viarchuška viadomaha na ŭvieś śviet simvała Dubaja źnikła niedzie ŭ navalničnych abłokach.
«Kožny prystojny dubajec pavinien źniać siońnia miascovy apakalipsis. Takaja pryhažość», — padpisała videa śpiavačka.
Na pytańnie, ci nie strašna było špacyravać, kali navokał adbyvajecca takoje, Hanna paśmichnułasia i adkazała, što ŭ jaje jość sabaka, tamu adsiedziecca doma nie było šansu.
— Asabista ja dychała i radavałasia, ciešyłasia śviežaści pavietra. Čakaju hryboŭ, a tam, moža, i biarozki vyrastuć, — pažartavała artystka.
Darečy, z nadvorja žartavała i inšaja biełaruska, jakaja apošnija hady stała žyvie ŭ Dubai — madel i błohierka Volha Nikifarava. Jana zapościła ŭ storys videa z mašyny, jakaja bolš płyvie, čym jedzie, i napisała: «Usim, chto piša i pytajecca, jak zaraz nadvorje ŭ Dubai, ci ciopłaja vada, voś adkaz: nadvorje tak sabie, ale vada ciopłaja. Usiudy».
Hanna Šarkunova miarkuje, što zaraz šmat chto budzie šukać kanśpirałahičnyja pryčyny pryrodnaha kataklizmu.
— Mabyć, pačnuć kazać, što heta praz toje, što dubajskija navukoŭcy z ekśpierymientami z zasievam abłokaŭ (u Dubai sapraŭdy aktyŭna pracujuć nad mahčymaściu štučna vyklikać apadki — «NN») źmianiajuć klimat i sami vyklikajuć hetyja kataklizmy… Ja nie śpiecyjalistka, ale dumaju, što čas ad času prosta zdarajucca Chaŭjery.
Zaraz, pa słovach Hanny, nadvorje cudoŭnaje, ale z nastupstvami stychii śpiecyjalisty buduć zmahacca jašče doŭha.
— Zatapiła vialikuju kolkaść damoŭ, asabliva paciarpieli pieršyja pavierchi, mašyn vielmi šmat patanułych. Aeraport da hetaha času nie pracuje, pasažyry palacieć nikudy nie mohuć, śpiać tam na padłozie… Było surjoznaje vyprabavańnie dla horada i ludziej.
Ale niahledziačy na ŭsio heta, Hanna ščyra zachaplajecca raźvićciom technałohij u Dubai.
— Ja zachaplajusia hetymi ludźmi, jakija sa svajho zasušlivaha rehijona i sucelnaha piasku sprabujuć i robiać kamfortny dla žyćcia ludziej horad. U ich płan da 2040 hoda zrabić Dubaj najlepšym u śviecie horadam dla žyćcia. Hučyć nierealistyčna, ale jany biarucca za samyja śmiełyja i ambicyjnyja prajekty — chaj to vyklikać doždž abo zrabić ź piasku aazis. Spadziajusia, što jany prydumajuć jašče štości z advodam vady i kanalizacyjaj na darohach, i doždž budzie paŭnavartasnaj radaściu dla ŭsich.
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ4
Kamientary