«U niejki momant ja zrazumieŭ, što nie mahu ŭstać biez dapamohi ruk». Komik Saša Kalinkin pra svaju chvarobu
Komik Saša Kalinkin u padkaście «Taki šlach» ščyra raskazaŭ pra historyju svajho zachvorvańnia.
Chvaroba, na jakuju pakutuje Saša Kalinkin, nazyvajecca śpinalnaja myšačnaja atrafija (SMA).
Pa słovach mužčyny, pieršyja prajavy hetaha hienietyčnaha zachvorvańnia ŭ jaho pačalisia ŭ padletkavym uzroście:
«Ja pamiataju, što hulaŭ u baskietboł, valejboł, biehaŭ i było ŭsio vydatna. Potym u niejki momant ja adčuŭ słabaść. Padumaŭ, što chiba stamiŭsia, nie paspaŭ, nie pajeŭ. Adčuvaŭ, što nie mahu biehčy, zajmacca. Heta pačało patrochi prahresavać. I ŭ niejki momant baćki spužalisia, vyrašyli, što treba niešta rabić. Mianie pavieźli ŭ nieŭrałahičny centr u Salihorsku. Pahladzieli. Nichto ničoha nie zrazumieŭ. Adpravili ŭ Minsk da prafiesara. Ja tam lažaŭ doŭhi čas u balnicy».
Kalinkin zhadvaje, što daktary zrabili jamu hienietyčny analiz, ale ničoha nie vyznačyli. U vyniku nie było adpaviednaha lačeńnia. Stan chłopca paharšaŭsia.
«U niejki momant ja zrazumieŭ, što nie mahu ŭstać biez dapamohi ruk. Stała zrazumieła, što niešta nie tak. Ja ros, a myšcy nie raśli. Zrabili novy analiz i vyznačyli, što heta SMA», — raskazvaje Kalinkin.
Pa słovach mužčyny, u toj čas nie było ŭkołaŭ ad SMA, i ŭsio lačeńnie jaho chvaroby zaklučałasia ŭ lačebnaj fizkultury, ukołach preparataŭ, jakija palapšajuć pieradaču niervovych impulsaŭ. U vyniku stan pastajanna paharšaŭsia.
«U niejki momant ja zusim nie moh samastojna padniacca z padłohi. I heta było strašna, — raskazvaje Kalinkin i z humaram dadaje: — Majo zachvorvańnie vyratavała mianie ad narkamanii, ałkahalizmu i turmy».
Saša Kalinkin ciapier žyvie ŭ Polščy. Lehalny status dazvoliŭ mužčynie prajści śpiecyjalnuju miedyčnuju kamisiju, pa vynikach jakoj u listapadzie 2023 hoda jaho ŭziali ŭ prahramu lačeńnia chvaroby.
«Adzin ukoł u pazvanočnik kaštuje 150 tysiač dalaraŭ. Ja pytajusia ŭ doktara: «A što ja budu vam vinien?» Mnie adkazali: «Ničoha».
Jak patłumačyŭ Kalinkin, spačatku robicca adzin ukoł, zatym praz dva tydni druhi. Zatym ukoł raz na niekalki miesiacaŭ, a paźniej — raz na paŭhoda. A praciahvacca heta moža, pa słovach mužčyny, «ci da kanca žyćcia, ci pakul nieabchodna».
Čytajcie jašče:
U Biełarusi ŭpieršyniu zaćvierdzili pratakoł lačeńnia dziaciej sa SMA
U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam23
Kamientary