Jeŭrapiejski kłub zarabiŭ na prodažy piva bolš, čym na tranśfiery futbalistaŭ
«Ja nie baču nidzie ŭ Jeŭropie, kab kłub zarablaŭ na pivie bolš, čym na futbalistach», — kaža žurnalist Tom Knipinh.
Hadavyja pakazčyki FK «Tvente» (Enschede), jaki vystupaje ŭ vyšejšym dyvizijonie Niderłandaŭ, pakazali, što kłub atrymaŭ čysty prybytak piać miljonaŭ jeŭra. Dachody ad hramadskaha charčavańnia taksama rezka vyraśli i dasiahnuli abarotu nie mienšaha za 10,5 miljonaŭ jeŭra, piša Twente Insite.
Tranśfiery Vacłava Černaha, Džejdena Astervołde i Kaśpiera Starynha prynieśli 6 442 000 jeŭra. Kali adminusavać vydatki, siarod inšaha, na amartyzacyju kamisij i inšyja patreby, to čysty prybytak ad tranśfieraŭ składzie 3 751 000.
Što hramadskaha charčavańnia, to «Tvente» dasiahnuŭ abarotu ŭ 10,5 miljonaŭ jeŭra, ale z hetaha jašče treba adniać vydatki na zakupki i zarobak piersanału. Pa słovach žurnalista Toma Knipinha, hetyja vydatki składajuć kala 4,5 miljonaŭ jeŭra.
Kali adniać heta z abarotu, to prybytak na pivie i hramadskim charčavańni składzie nie mienš za 6 miljonaŭ jeŭra.
Heta pryvodzić da dziŭnaj vysnovy, što «Tvente» zarablaje bolš hrošaj ad dachodaŭ ad hramadskaha charčavańnia, čym ad tranśfiernych dachodaŭ. Pa słovach žurnalista Toma Knipinha, heta vielmi charakterna.
«Dziŭna, što «Tvente» zarablaje bolš hrošaj na pivie, čym na hulcach. Ja nie baču nidzie ŭ Jeŭropie, kab kłub zarablaŭ na pivie bolš, čym na futbalistach», — zaklučaje jon.
U sioletnim čempijanacie «Tvente» idzie na 3-m miescy, napieradzie tolki PSV i «Fiejenord».
U rejtynhu futbolnych lih čempijanat Niderłandaŭ, pavodle UEFA, na piatym miescy.
Ciapier čytajuć
Stali viadomyja padrabiaznaści taho, jak u Vjetnamie zatrymali Vieramiejčyka12
Kamientary