Hrupa Raiffeisen straciła €84 miljony z-za devalvacyi biełaruskaha rubla
Devalvacyja biełaruskaha rubla na 19% pryniesła stratu €84 młn u sukupnym kapitale, a devalvacyja rasijskaha rubla na 33% — straty na €1 185 młn. Pra heta havorycca ŭ adkrytaj finansavaj spravazdačnaści hrupy Raiffeisen za III kvartał, źviarnuŭ uvahu Office Life.
U Biełarusi čysty pracentny dachod hrupy źniziŭsia na €25 młn u paraŭnańni sa studzieniem—vieraśniem 2022 hoda z-za padzieńnia rynkavych pracentnych stavak.
Košt finansavych aktyvaŭ, jakija adnosiacca da biełaruskaha siehmienta hrupy, skaraciŭsia z €1679 młn na pačatak hoda da €1408 młn.
Biełaruś znachodzicca ŭ takim ža izalavanym stanoviščy, jak i RF, i jaje ekanamičnaja dziejnaść nacelenaja na naładžvańnie kantaktaŭ z handlovymi partniorami za miežami Jeŭropy, havorycca ŭ makraekanamičnym prahnozie RFI. Nievialikaje adnaŭleńnie ekanomiki było padtrymana ŭradavymi stymułami spryjać technałahičnaj madernizacyi pramysłovaści, pašyreńniu pramysłovaj vytvorčaści, adradžeńniu ŭnutranaha popytu i padzieńniu inflacyi. Adnak pavieličeńnie impartu zamarudziła adnaŭleńnie. Pavodle acenki RFI, hadavy rost realnaha VUP u RB sioleta składzie 1,5%, a ŭ 2024-m i 2025-m — pa 2%. Pry niehatyŭnym scenary VUP u RB u hetym hodzie składzie 1,0%, u 2024-m — 1,9%, a ŭ 2025-m — 0,4%.
Asnoŭnyja dachody hrupy, za vyklučeńniem rynkaŭ Rasii i Biełarusi, vyraśli na 20% u paraŭnańni z anałahičnym pieryjadam minułaha hoda da €4,430 młn, što abumoŭlena atrymańniem čystaha adsotkavaha dachodu.
Kolkaść ofisaŭ banka skaraciłasia na 154 u hadavym vyličeńni da 1545. Najbolšaje źnižeńnie adbyłosia praz vajnu va Ukrainie (na 67), a taksama ŭ Sierbii praz kansalidacyju paśla źlićcia (na 32), u Čechii (na 25) i ŭ Biełarusi (na 13).
Čysty prybytak ad klirynhavych, raźlikovych i płaciežnych pasłuh taksama źniziŭsia na €24 młn u vyniku źnižeńnia tranzakcyj i dachodaŭ, asabliva ŭ Rasii i Biełarusi.
Kamientary