Ekśpierty MAHATE za tydzień zafiksavali la Zaparožskaj AES bolš za 20 vybuchaŭ
Heta moža śviedčyć pra ŭzmacnieńnie vajennaj aktyŭnaści ŭ rehijonie, jakaja taksama moža ŭjaŭlać patencyjnuju pahrozu jadziernaj biaśpiecy na abjekcie.
Hienieralny dyrektar Mižnarodnaha ahienctva atamnaj enierhii (MAHATE) Rafael Hrosi zajaviŭ, što ŭ rajonie Zaparožskaj atamnaj elektrastancyi, imavierna, uzmacniłasia vajennaja aktyŭnaść, piša «Mieduza».
Jak zajaviŭ Hrosi, na praciahu apošniaha tydnia ekśpierty MAHATE, jakija pracujuć na stancyi, čuli bolš za 20 vybuchaŭ. Ź jahonych słoŭ, heta «moža śviedčyć pra ŭzmacnieńnie vajennaj aktyŭnaści ŭ rehijonie, jakaja taksama moža ŭjaŭlać patencyjnuju pahrozu jadziernaj biaśpiecy na abjekcie».
Pavodle spravazdač ekśpiertaŭ, vybuchi adbylisia na niekatoraj adlehłaści ad Zaparožskaj AES.
Administracyja ZAES taksama prainfarmavała kamandu MAHATE ab tym, što ranicaj 7 vieraśnia ŭ susiednim Enierhadary, dzie žyvuć supracoŭniki stancyi, adbyłosia niekalki ŭdaraŭ bieśpiłotnikaŭ. Ab paciarpiełych nie paviedamlałasia. Ekśpierty ahienctva praciahvajuć fiksavać, što pa pierymietry stancyi, ale nie na terytoryi AES, raźmieščany miny.
U svaju čarhu rasijskaje kiraŭnictva ZAES na dva dni adpuścić z pracy častku supracoŭnikaŭ praz bojaź «čarhovych teraktaŭ z boku Ukrainy», paviedamiŭ «Interfaksu» daradca kiraŭnika kancerna «Rasenierhaatam» Renat Karčaa. Z 8 da 10 vieraśnia na anieksavanaj RF častcy Zaparožskaj vobłaści prachodziać vybary ŭ Zakanadaŭčy schod.
Zaparožskaja AES — samaja bujnaja atamnaja stancyja ŭ Jeŭropie, jakaja była zachoplenaja rasijskimi vajskoŭcami ŭ pieršyja dni poŭnamaštabnaha ŭvarvańnia va Ukrainu. Stancyja nie vypracoŭvaje elektraenierhii ź vieraśnia 2022 hoda. Dva enierhabłoki ZAES ramantujuć, try znachodziacca ŭ chałodnym režymie, jašče adzin — u režymie haračaha spynieńnia dla zabieśpiačeńnia ŭłasnych patreb stancyi.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary