«Palaki nie chočuć pracavać». 34 hadziny ŭ čarzie na miažy prastajaŭ žychar Baranavičaŭ

Pavodle słoŭ surazmoŭcaŭ vydańnia, jakija vyjazdžali ŭ apošnija dni za miežy krainy, samyja vialikija čerhi na miažy nazirajucca ŭ punkcie propusku Brest — Ciarespal. Ciapier heta adziny dziejny pamiežny pierachod na miažy z Polščaj.

Navat tyja, chto jechaŭ u Polšču na hramadskim transparcie, byli vymušanyja hadzinami čakać svajoj čarhi na dahlad.

— Jechali na aŭtobusie. U 3 hadziny nočy stali ŭ čarhu, u 10 ranicy zajechali da biełarusaŭ. Z polskaj miažoj atrymałasia 14 hadzin. Vielmi pavolna pracuje polski bok na ŭjezd. Napeŭna, prosta dali kamandu nie pracavać. Bo tydzień tamu jany ŭsio rabili našmat chutčej. I nie było takich čerhaŭ, — raspaviała BAR24 haradžanka, jakaja pierasiakała biełaruska-polskuju miažu na aŭtobusie 29 žniŭnia.

Tyja ž, chto jechaŭ u Polšču na aŭtamabilach, naohuł stavili asabistyja rekordy. Pavodle słoŭ žychara Baranavičaŭ, jaki pierasiakaŭ miažu 29 žniŭnia na mašynie, u čarzie jon prastajaŭ 34 hadziny!

— Heta rekord. Palaki nie chočuć pracavać ad słova «zusim». Da taho ž, 70% usiaho transpartnaha patoku adpraŭlajuć na dahlad i renthien, — kaža mužčyna.

Haradžanie raspaviadajuć nie tolki pra marudlivaść u pracy polskich pamiežnych słužbaŭ, ale i pra pavyšanuju ŭvahu ź ich boku.

— Zadavali vielmi šmat pytańniaŭ pra pryčyny pajezdki. Kudy jedziem, navošta, čamu tak časta jeździm i jak doŭha budziem. Što robim na pracy, jak nazyvajecca firma, dzie jana znachodzicca. Takija pytańni zaŭsiody zadajuć tym, u kaho jość pracoŭnyja vizy. Ale nie tak padrabiazna raspytvajuć, jak było ciapier, — raspaviała haradžanka, jakaja jechała ŭ Polšču na pracu.

Čerhi na miažy ź Litvoj: 10 hadzin — «heta jašče chutka»

Nienašmat lepšaja situacyja z čerhami i na biełaruska-litoŭskaj miažy. Pavodle słoŭ žančyny, jakaja jechała ŭ Litvu 27 žniŭnia na mašynie praz punkt propusku Bieniakoni, prachodžańnie dźviuch miežaŭ u jaje zaniało blizu 10 hadzin.

— I heta jašče chutka. Znajomy na Katłoŭcy prastajaŭ bolš za sutki. Pry takoj ža čarzie, — adznačyła dziaŭčyna.

Stojačy ŭ čerhach, biełarusy niaredka abmiarkoŭvajuć pamiž saboj mahčymaje poŭnaje zakryćcio miežaŭ z Polščaj i Litvoj. Tym bolš, što apošnim časam hetyja tema nie vychodzić z navinavaha paradku dnia. Pavodle słoŭ adnych haradžan, «bolšaść ličyć, što nichto jaje nie zakryje».

Inšyja ž kažuć, što hetaje pytańnie ŭ mnohich biełarusaŭ vyklikaje niepakoj.

— Ludzi pieražyvajuć, što ŭ mnohich siemji, dzieci, baćki, siabry apynucca pa roznyja baki miežaŭ. I nichto nie choča, kab heta adbyłosia, — reziumavała adna z surazmoŭnic.

Pavodle infarmacyi Dziaržpahrankamiteta Biełarusi, stanam na 12:00 30 žniŭnia samyja vialikija čerhi na miažy naziralisia ŭ punkcie propusku Brest. Na vyjezd z krainy stajała bolš za 250 lehkavych aŭtamabilaŭ i 28 aŭtobusaŭ. Na druhim miescy pa zahružanaści — punkt propusku Bieniakoni. Tam svajoj čarhi na vyjezd čakali bolš za 70 lehkavych i 140 hruzavych mašyn.

• 7
• 0
• 5
• 0
• 4
• 9
• 12
• 0