«U siłavikoŭ pavinny i tak być usie hetyja videa». Aŭtar vystaŭlenaha ŭ sieciva filma pra pratesty prakamientavaŭ hramadskuju reakcyju na svoj tvor
24 lipienia litoŭski partał Delfi na svaim jutub-kanale vykłaŭ film pra biełaruskija pratesty 2020 hoda. Heta vyklikała reakcyju ŭ praŭładnych telehram-kanałach i kanałach, blizkich da biełaruskich siłavikoŭ. Tam zajavili, što litoŭskaja stužka dapamoža im u pošukach pratestoŭcaŭ. Biełarusy ŭ čatach i sacyjalnych sietkach pačali aburacca faktam źjaŭleńnia filma, bo tam bačnyja tvary šmatlikich udzielnikaŭ pratestaŭ. «Radyjo Svaboda» ŭziała kamientar u aŭtara hetaha tvora.
Aŭtar filma, biełarus Mikałaj Maminaŭ, pačaŭ zdymać pratesty, kali 9 žniŭnia 2020 hoda zakrylisia ŭčastki paśla prezidenckich vybaraŭ. Film kančajecca 20 vieraśnia, adnym ź niadzielnych pratestaŭ. U hety ž dzień aŭtara zatrymali.
Pavodle słoŭ Mikałaja, aŭtary videa imknulisia nie pakazvać niejkich novych kadraŭ.
«My pravodzili manitorynh, hladzieli takija ž kadry 9—10 žniŭnia, jany jość na stokach, na mižnarodnych płatformach. Na hetych kadrach i ja jość, tam jość dobryja videa ŭ 4K. Jość film pra padziei na «Ryzie» 10 žniŭnia, usio heta jość u dostupie niezabluranaje. My z redaktarami išli pa chranałohii i zamazvali jaŭnych ludziej, kaho dobra bačna. U ich (siłavikoŭ) pavinny być usie hetyja videa.
Da taho ž mianie zatrymlivali z hetym telefonam, mianie dapytvali ŭ KDB, telefon vymali. Pry pieršym zatrymańni mianie zabrali z kvatery. Videa, fota, jakija tam byli, jany, chutčej za ŭsio, vyniali, jak i ŭva ŭsich astatnich», — kaža Mikałaj Maminaŭ.
Taho, što kadry siłaviki z telefona spampavali dakładna, aŭtar videa nie bačyŭ na svaje vočy. Mikałaj pačaŭ zdymać videa pra biełaruskija pratesty spantanna i nie adrazu płanavaŭ zrabić z hetaha kino.
«Ja pa prafiesii režysior i apieratar, i ideja zdymać usio, što adbyvajecca, uźnikła adrazu ŭviečary, kali byli vybary. Paśla ja ŭsio fiksavaŭ padśviadoma, adrazu idei filma ŭ mianie nie było. Heta była prosta chronika, jakuju ja zdymaŭ dzień u dzień. Paśla ja vymušany byŭ vyjechać, va Ukrainu, paśla ŭ Litvu. I ideja zrabić takuju pracu pryjšła ŭžo niedzie praz hod paśla vybaraŭ.
Samu chranałohiju filma ŭžo rabiŭ prafiesijny režysior mantažu. Film doŭha nie vychodziŭ, bo zaniało čas prybrać tvary, zabluryć ich, asabliva 9—10 žniŭnia», — raskazvaje aŭtar.
Film kančajecca akcyjaj 20 vieraśnia 2020 hoda. Tady Mikałaj rabiŭ repartaž dla zamiežnaha ahienctva. A ŭviečary taho ž dnia aŭtara, pavodle jaho słoŭ, zatrymali.
«Ja pierasoŭvaŭsia na rovary paŭsiul, nie nasiŭ maski, mianie vyličyli. Pa mianie pryjšli prosta dadomu, u kvateru. Ja trapiŭ u Savieckaje RUUS, paśla na Akreścina, paśla dali 15 sutak, jakija ja adbyvaŭ u Žodzinie. Paśla vyzvaleńnia ja prabyŭ na voli dzion 6, a paśla ŭ nastupnuju niadzielu my z žonkaj pajšli ŭ kramu, va ŭniviersam «Ryha», dzie nas zatrymali druhi raz. Žonku ŭnačy vypuścili, a mianie źbili, pahražali raspravaj. Paśla mnie prysudzili 20 sutak», — pryhadvaje Mikałaj.
Paśla druhoha vyzvaleńnia da Mikałaja damoŭ siłaviki sprabavali trapić jašče raz, i jon vyrašyŭ vyjechać va Ukrainu. Tady jon ź siamjoj pierabraŭsia ŭ Čarnihaŭ.
Padčas pratestaŭ Mikałaj supracoŭničaŭ ź niekatorymi ŚMI, zdymaŭ materyjały dla mižnarodnych ahienctvaŭ.
Ciapier čytajuć
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač24
Kamientary