Milinkievič vykazaŭsia pra nastupstvy zamieny Śviatłany Cichanoŭskaj i mahčymy jaje palityčny los paśla 2025 hoda
Eks-kandydat u prezidenty (2006) Alaksandr Milinkievič u efiry «Jeŭraradyjo» pieraściaroh ad ratacyi lidarki demakratyčnych siłaŭ Biełarusi, adznačyŭ najbolš mocny bok Cichanoŭskaj i parazvažaŭ pra jaje miesca ŭ novaj Biełarusi.
Na pohlad Milinkieviča, razmovy pra toje, što našy demakratyčnyja siły nie tudy zarulili ci što niama nijakich vynikaŭ ich dziejnaści, a taksama prapanovy źmianić palityčnych lidaraŭ, pierš za ŭsio Cichanoŭskuju, nie ŭličvajuć absalutna niedemakratyčnuju situacyju ŭ Biełarusi.
«U nas niama vybaraŭ, nie zachoŭvajucca pravy čałavieka. U hetych umovach nielha sprabavać vybirać niejki parłamient, ministraŭ, prezidenta. Heta ŭsio budzie ŭ demakratyčnaj krainie. Ciapier treba zachavać lehitymnaść jaje lidara Cichanoŭskaj i subjektnaść Biełarusi jak jašče niezaležnaj krainy», — adznačaje były palityk.
Na jaho dumku, ratacyjaj budzie zrujnavany instytut Cichanoŭskaj, toje, što było stvorana dziejnaściu samoj Śviatłany Cichanoŭskaj i jaje Ofisam:
«Heta była b trahičnaja pamyłka. Ciapier jana tvar niezaležnaj Biełarusi. Jana harant niezaležnaści našaj krainy ŭ vačach Jeŭropy i Złučanych Štataŭ. Likvidacyja jaje instytutu nie aznačaje, što z tymi, chto pryjdzie joj na źmienu praz ratacyju ci praz vyłučeńnie niejkaj piersony, buduć sustrakacca i havaryć, ličyć ich pradstaŭnikami demakratyčnaj supolnaści».
Alaksandr Milinkievič adznačaje, što «ŭ Cichanoŭskaj jość toje, čaho niama ŭ astatnich: jana vyjhrała ŭ vačach bolšaści biełarusaŭ i amal usiaho demakratyčnaha śvietu vybary. Jana lehitymny čałaviek. Novy čałaviek, jaki b jon ni byŭ, nie budzie lehitymnym».
Milinkievič zaklikaje ni ŭ jakim razie nie mianiać Śviatłanu Cichanoŭskuju.
«Krytyka, dyskusii mohuć być. Ale źmianić toje, što ŭtvaryłasia, što zachoŭvaje našy šancy na niezaležnuju dziaržavu, nielha».
Na pytańnie pra toje, što budzie ź lehitymnaściu Cichanoŭskaj paśla vybaraŭ 2025 hoda, Milinkievič adkazaŭ, što jana zachavajecca ŭ vypadku, kali vybary buduć niedemakratyčnymi.
«Čas chutka źmianiajecca, adbyvajucca niepradkazalnyja rečy. Kali na toj čas buduć demakratyčnyja vybary, to nieviadoma, ci jana budzie ŭdzielničać u ich. Mahčyma, jana zrobić tak, jak abiacała — raśpiša novyja vybary i pojdzie».
U lubym vypadku, jak adznačyŭ Milinkievič, takim raskručanym na suśvietnym uzroŭni ludziam pakidać palityku nie treba:
«Jana moža być ministram ci parłamientaryjem. Kali niejkija siły jość, to jana musić zastacca ŭ palitycy i nie adychodzić».
Čytajcie jašče:
Milinkievič prapanavaŭ nazvać Nacyjanalny aeraport «Minsk» imiem Stanisłava Šuškieviča
Alaksandr Milinkievič: Demakraty ŭ Rasii — za demakratyčnuju impieryju
Ciapier čytajuć
Pasoł Ukrainy pa pytańniach Biełarusi adkazaŭ na dyskusiju Viačorki i krytykaŭ Cichanoŭskaj: Vaša ŭzajemnaja nieprymalnaść adyhryvaje vielmi niekanstruktyŭnuju rolu4545
Kamientary